पणजी : पुढारी वृत्तसेवा
राज्यात उष्मा वाढला असून, हिवाळ्यात हुडहुडी ऐवजी अंग घामाने भिजण्याचे प्रकार सुरू झाले आहेत. राज्यात सरासरी तापमान ३७.२ अंश सेल्सिअसवर पोहोचले आहे. हवामान खात्याने पुढील तीन दिवस उष्णतेचा येलो अलर्ट जारी केला आहे. शनिवारी तुरळक पावसाचा अंदाज आहे.
म्हापसामध्ये मंगळवारी ४१.४ तापमानाची नोंद झाली. हवामान खात्याच्या अधिकाऱ्यांच्या मते मंगळवारी दैनंदिन कमाल तापमानाचे ऑक्टोबर महिन्यातील सर्व ऐतिहासिक विक्रम मोडले आहेत. सोमवारी पणजीमध्ये सरासरीपेक्षा ४.८ ने जास्त, ३६.३ तापमानाची नोंद झाली.
ज्यामुळे तापमान १६ ऑक्टोबर २००८ रोजी नोंदवलेल्या राजधानीच्या ऑक्टोबर महिन्यातील ३७.२ या विक्रमी तापमानाजवळ पोहोचले आहे. आज बुधवारीही ३७ अंश तापमान नोंद झाले. पणजीमध्ये १ ऑक्टोबर रोजी ३२.८ तापमानाची नोंद झाली.
त्यानंतर ती सरासरी वाढत राहिली. त्यानंतर ११ ऑक्टोबर रोजी तापमानात आणखी वाढ होऊन ते ३६.३ व १२ ऑक्टोबर रोजी ३६.३ व १३ रोजी ३६.३ व दि. १४ रोजी ३६ अंश सेल्सिअस नोंद झाली.
हवामानाच्या अंदाजानुसार, आठवड्याच्या उत्तरार्धात पावसाची शक्यता आहे. १६ ऑक्टोबर रोजी उत्तर गोवा आणि कुशावती जिल्ह्यातील घाट परिसरात हलक्या पावसाची शक्यता आहे. १७ ते १९ ऑक्टोबर दरम्यान राज्यभरात हलका पाऊस किंवा मेघगर्जेसह पावसाचा अंदाज आहे.