पणजी : पुढारी वृत्तसेवा
काँग्रेसचा नैसर्गिक मित्रपक्ष असलेल्या गोवा फॉरवर्ड पक्षाने (जीएफपी) आघाडीबाबत सकारात्मकता दाखवल्यामुळे आता महाआघाडीबाबतच्या चर्चा पुढे जाण्याची शक्यता आहे, असे काँग्रेसचे प्रदेशाध्यक्ष गिरीश चोडणकर यांनी प्रसारमाध्यमांना सांगितले.
चोडणकर यांनी गोवा फॉरवर्ड पक्षाच्या आघाडी करण्याबाबतच्या सकारात्मक निर्णयाचे स्वागत केले असून, त्यामुळे युतीवर पुन्हा चर्चा सुरू होण्याचा मार्ग मोकळा झाला आहे, असे म्हटले. चोडणकर यांनी आगामी निवडणुकांच्या पार्श्वभूमीवर मतदारांमध्ये फूट पाडण्यासाठी भाजप बनावट राजकीय पक्ष स्थापन करण्याचा आणि निष्क्रिय प्रादेशिक पक्षांना पुनरुज्जीवित करण्याचा कट रचल्याचा आरोप केला.
भाजपकडे राजकारणांना विकत घेण्यासाठी आणि बनावट राजकीय पक्ष स्थापन करण्यासाठी भरीव आर्थिक संसाधने आहेत. शिवाय राज्यातील भाजप नेतेही यासाठी निधी पुरवतील. गोव्याची मते विभागून विजय मिळवण्यासाठी ते प्रादेशिक पक्षांच्या पुनरुज्जीवनालाही निधी देऊ शकतात, असा दावाही त्यांनी केला.
मडगावमध्ये नेते राहुल गांधी यांच्या भेटीनंतर काँग्रेसने दिलेल्या संबोधनावर 'आप'च्या नेत्यांनी टीका केल्याबद्दल त्यांनी आक्षेप घेतला, कारण गांधींनी आपल्या भाषणात 'आप'चा उल्लेख केला नव्हता. पंतप्रधान नरेंद्र मोदी आणि केंद्रीय गृहमंत्री अमित शाह यांच्यासह आपने गांधींवर टीका केली असताना,
'आप' गांधींनाच लक्ष्य करत आहे. याचा गोव्याच्या मतदारांनी गांभीर्याने विचार केला पाहिजे, असेही चोडणकर म्हणाले. असेही चोडणकर म्हणाले. जनता भाजप सरकारवर नाराज आहे. त्यांचे डावपेच यावेळी यशस्वी होणार नाहीत. गोव्याच्या जनतेने राज्याचा आणि पर्यावरणाचा विनाश, तसेच विक्रमी बेरोजगारी पाहिली आहे, असे चोडणकर म्हणाले. गोवेकर सुज्ञ आहेत आणि अशा विभाजनवादी राजकारणाला नाकारतील. काँग्रेस लोकांच्या आकांक्षांवर विसंबून प्रचार करेल, असेही चोडणकर म्हणाले.