Stock Market Today: अमेरिका-इराण संघर्ष पुन्हा वाढल्याने जागतिक बाजारपेठांमध्ये भीतीचे वातावरण निर्माण झाले असून त्याचा थेट परिणाम भारतीय शेअर बाजारावरही दिसून आला. मंगळवारी विकली एक्सपायरीच्या दिवशी शेअर बाजाराची सुरुवात मोठ्या घसरणीसह झाली.
व्यवहाराच्या सुरुवातीला निफ्टी 143 अंकांनी घसरून 24,068 वर, तर सेन्सेक्स 344 अंकांनी घसरून 77,272 वर उघडला. सोमवारी निफ्टी 24,211 अंकांवर किरकोळ वाढीसह बंद झाला होता. मात्र, नव्या भू-राजकीय तणावामुळे गुंतवणूकदारांमध्ये भीतीचे वातावरण निर्माण झाले आहे.
अमेरिकेचे राष्ट्राध्यक्ष डोनाल्ड ट्रम्प यांनी अमेरिकन काँग्रेसला इराणविरुद्धची लष्करी कारवाई पुन्हा सुरू झाल्याची माहिती दिल्यानंतर जागतिक बाजारात अनिश्चितता वाढली आहे. या घडामोडीनंतर कच्च्या तेलाच्या किंमतीत 8 ते 10 टक्क्यांची वाढ झाली असून ब्रेंट क्रूडचा दर प्रति बॅरल 85 डॉलरच्या जवळ पोहोचला आहे. कच्च्या तेलाच्या वाढलेल्या किंमतीमुळे भारतासारख्या तेल आयात करणाऱ्या देशांवर आर्थिक दबाव वाढण्याची शक्यता व्यक्त केली जात आहे.
भारतासोबतच इतर आशियाई बाजारांमध्येही विक्रीचा दबाव दिसून आला. जपानचा निक्केई निर्देशांक सुमारे 0.7 टक्क्यांनी, तर दक्षिण कोरियाचा KOSPI निर्देशांक 2.25 टक्क्यांनी घसरला. यामुळे जागतिक गुंतवणूकदारांमध्ये जोखीम टाळण्याचा कल वाढल्याचे दिसून आले.
कच्च्या तेलाच्या किंमती वाढल्यामुळे महागाईचा धोका वाढू शकतो. त्यामुळे अमेरिकेची मध्यवर्ती बँक (Fed) व्याजदर वाढवण्याचा विचार करू शकते, अशी भीती बाजारात आहे. परिणामी अमेरिकन बाँड यिल्ड आणि डॉलर इंडेक्समध्ये वाढ झाली असून डॉलर मजबूत झाल्यामुळे रुपयावरही दबाव वाढला आहे. कमकुवत रुपया आणि महागडे कच्चे तेल ही भारतीय अर्थव्यवस्थेसाठी आणि शेअर बाजारासाठी नकारात्मक बाब मानली जाते.
सोमवारी परदेशी संस्थात्मक गुंतवणूकदारांनी (FII) 3,062 कोटी रुपयांची विक्री केली. त्याउलट देशांतर्गत संस्थात्मक गुंतवणूकदारांनी (DII) 2,171 कोटी रुपयांची खरेदी करत बाजाराला काहीसा आधार दिला.
जागतिक वातावरण नकारात्मक असले तरी देशांतर्गत गुंतवणूकदारांकडून सातत्याने होत असलेली खरेदी बाजाराला आधार देत आहे. माहिती तंत्रज्ञान (IT) कंपन्यांचे चांगले तिमाही निकाल, घसरणीनंतर होत असलेली खरेदी आणि मिडकॅप निर्देशांक विक्रमी उच्चांकावर असल्यामुळे बाजारात दीर्घकालीन सकारात्मकता कायम असल्याचे तज्ज्ञांचे मत आहे.
SAMCO Securities चे तांत्रिक विश्लेषक ओम मेहरा यांच्या मते, 24,300 अंकांचा स्तर निफ्टीसाठी महत्त्वाचा अडथळा आहे. हा स्तर पार केल्यास निर्देशांक 24,450 पर्यंत जाऊ शकतो. मात्र, 23,800 अंकांचा स्तर महत्त्वाचा सपोर्ट असून तो तुटल्यास आणखी घसरण होण्याची शक्यता आहे.
तर HDFC Securities चे तांत्रिक विश्लेषक नागराज शेट्टी यांच्या मते, सध्या निफ्टी 23,800 ते 24,500 या श्रेणीत व्यवहार करत आहे. निचांकी पातळीवरून झालेल्या रिकव्हरीनंतर आगामी काळात निफ्टी 24,500 च्या दिशेने वाटचाल करू शकतो, तर 24,000 अंकांचा स्तर अल्पकालीन आधार राहण्याची शक्यता आहे.
तज्ज्ञांच्या मते, सध्याची घसरण ही प्रामुख्याने जागतिक घडामोडींमुळे झाली आहे. अमेरिका-इराण संघर्ष, कच्च्या तेलाच्या किंमती, डॉलरची मजबुती आणि परदेशी गुंतवणूकदारांची विक्री यावर पुढील काही दिवस बाजाराची दिशा अवलंबून राहणार आहे. त्यामुळे गुंतवणूकदारांनी घाईघाईने निर्णय न घेता जागतिक घडामोडींवर लक्ष ठेवत दीर्घकालीन दृष्टीकोन ठेवणे अधिक फायदेशीर ठरू शकते.