Stock Market Closing Updates
भारतीय शेअर बाजारात गुरुवारी (दि. ३ जुलै) सलग दुसऱ्या दिवशी अस्थिरता दिसून आली. शेअर बाजाराने आज तेजीत सुरुवात केली होती. पण आजच्या सत्रातील अखेरच्या तासांत प्रॉफिट बुकिंग झाल्याने सेन्सेक्स- निफ्टी लाल रंगात बंद झाले. सेन्सेक्स (Sensex) १७० अंकांनी घसरून ८३,२३९ वर बंद झाला. तर निफ्टी ५० निर्देशांक (Nifty 50) ४८ अंकांच्या किरकोळ घसरणीसह २५,४०५ वर स्थिरावला.
सेन्सेक्सवर कोटक बँक शेअर्स १.९ टक्के घसरला. त्याचबरोबर बजाज फिनसर्व्ह, बजाज फायनान्स, अदानी पोर्ट्स, टायटन, ट्रेंट, एसबीआय हे शेअर्सही घसरले. मारुती, इन्फोसिस, एशियन पेंट्स, एनटीपीसी, हिंदुस्तान युनिलिव्हर इर्टनल हे शेअर्स वाढून बंद झाले.
अमेरिका आणि भारत यांच्यातील संभाव्य द्विपक्षीय व्यापार कराराकडे गुंतवणूकदारांचे लक्ष लागले आहे. त्याआधी गुंतवणूकदारांनी सावध भूमिका घेतल्याचे दिसून आले. परिणामी, सेन्सेक्स दिवसाच्या उच्चांकावरुन सुमारे ६०० अंकांनी खाली आला.
बाजारातील आजच्या घसरणीमुळे बीएसई सूचीबद्ध कंपन्यांचे बाजार भांडवल सुमारे १.५ लाख कोटींनी कमी होऊन ४६० लाखांपर्यंत खाली आले.
शेअर बाजारात घसरण असतानाही काही क्षेत्रीय निर्देशांकांमध्ये मजबुती दिसून आली. निफ्टी मीडिया निर्देशांकाने १.४ टक्के वाढीसह सर्वांत चांगली कामगिरी केली. निफ्टी ऑटो ०.४ टक्के वाढला. तर निफ्टी आयटी सपाट पातळीवर राहिला. तर दुसरीकडे सरकारी बँकिंग शेअर्समध्ये प्रॉफिट बुकिंग दिसून आले. पीएसयू बँक निर्देशांक ०.९ टक्के घसरला. निफ्टी रियल्टी ०.७ टक्के घसरून बंद झाला. दरम्यान, बीएसई मिडकॅप सपाट पातळीवर तर स्मॉलकॅप ०.४ टक्के वाढला.