मुंबई : शेअर बाजारात गुंतवणूक करणाऱ्यांसाठी एक अत्यंत महत्त्वाची माहिती समोर आली आहे. पुढील आठवड्यात भारतीय शेअर बाजारातील व्यवहारांचे वेळापत्रक बदलणार असून, महत्त्वाच्या सणांमुळे बाजार दोन दिवस बंद राहणार आहे. परिणामी, गुंतवणूकदारांना प्रत्यक्ष व्यवहारांसाठी केवळ तीन दिवसांचाच अवधी मिळणार आहे.
नॅशनल स्टॉक एक्सचेंज (NSE) आणि बॉम्बे स्टॉक एक्सचेंज (BSE) ने जाहीर केलेल्या अधिकृत सुट्यांच्या यादीनुसार, मंगळवारी ३१ मार्च रोजी 'महावीर जयंती' निमित्त बाजार बंद राहील. त्यानंतर शुक्रवारी ३ एप्रिल रोजी 'गुड फ्रायडे' निमित्त देखील कामकाजाला सुटी असेल. विशेष म्हणजे, चालू आठवड्यातही रामनवमीच्या सुटीमुळे व्यवहारांचे सत्र मर्यादित राहिले होते, आता सलग दुसऱ्या आठवड्यातही बाजाराचे कामकाज कमी दिवस चालणार आहे.
सरत्या वर्षाचा विचार करता, सन २०२६ मध्ये शेअर बाजाराला एकूण १६ दिवस सार्वजनिक सुट्या जाहीर करण्यात आल्या आहेत. यातील काही सुट्या उलटून गेल्या असून, आगामी काळातही विविध सण आणि विशेष प्रसंगी बाजार बंद राहणार आहे. एप्रिल महिन्यात १४ तारखेला भारतरत्न डॉ. बाबासाहेब आंबेडकर जयंती, १ मे रोजी महाराष्ट्र दिन आणि २८ मे रोजी बकरी ईद निमित्त व्यवहार थांबवले जातील.
वर्षाच्या उत्तरार्धातही सुट्यांची मोठी रांग आहे. यामध्ये जून महिन्यात मोहरम, सप्टेंबरमध्ये गणेश चतुर्थी, ऑक्टोबरमध्ये गांधी जयंती व दसरा, नोव्हेंबरमध्ये दिवाळी व गुरुनानक जयंती आणि डिसेंबरमध्ये नाताळ (ख्रिसमस) निमित्त ट्रेडिंग बंद राहील.
शेअर बाजाराप्रमाणेच कमोडिटी मार्केटच्या (MCX) वेळापत्रकातही बदल करण्यात आला आहे. महावीर जयंतीच्या दिवशी 'मल्टी कमोडिटी एक्सचेंज'वरील सकाळचे सत्र (सकाळी ९ ते दुपारी ५) बंद राहील, मात्र सायंकाळच्या सत्रात (संध्याकाळी ५ ते रात्री ११:३०) व्यवहार पूर्ववत सुरू होतील. याउलट, गुड फ्रायडेच्या दिवशी मात्र MCX वरील सकाळ आणि संध्याकाळ अशा दोन्ही सत्रांमधील कामकाज पूर्णतः बंद राहणार आहे.
दुसरीकडे, नॅशनल कमोडिटी अँड डेरिव्हेटिव्हज एक्सचेंज (NCDEX) महावीर जयंती आणि गुड फ्रायडे या दोन्ही दिवशी पूर्णवेळ बंद राहणार आहे. एकूणच, आगामी काळात सणासुदीच्या सुट्यांमुळे शेअर आणि कमोडिटी बाजारातील कामकाजाचे दिवस कमी होणार असल्याने गुंतवणूकदारांना आपले नियोजन विचारपूर्वक करावे लागणार आहे.