PNG vs LPG Which Is Cheaper Cooking Gas Comparison: मध्यपूर्वेत सुरू असलेल्या तणावाचा परिणाम आता भारतातील घरगुती स्वयंपाकाच्या खर्चावरही दिसू लागला आहे. अमेरिका-इस्त्रायल आणि इराण यांच्यातील परिस्थितीमुळे गॅस आणि तेलाच्या पुरवठ्यावर दबाव आला आहे. या पार्श्वभूमीवर केंद्र सरकार नागरिकांना PNG गॅसकडे वळण्याचा सल्ला देत आहे. त्यामुळे सध्या एक प्रश्न सर्वांच्या मनात आहे PNG आणि LPG गॅस यापैकी कोण जास्त किफायतशीर?
PNG म्हणजे पाइपलाइनद्वारे घरात थेट येणारा गॅस, तर LPG हा सिलेंडरमध्ये मिळणारा गॅस आहे. PNG चे मोजमाप एससीएम (Standard Cubic Meter) मध्ये केले जाते, तर LPG किलोमध्ये मोजला जातो.
चार सदस्यांच्या कुटुंबासाठी दररोज सुमारे 0.5 एससीएम PNG लागतो. म्हणजे महिन्याला सुमारे 15 एससीएम वापर होतो. याचं LPG मध्ये रूपांतर केल्यास हा वापर साधारण 11-12 किलो LPG इतका होतो.
साधारणपणे 14.2 किलोचा LPG सिलेंडर 25 ते 35 दिवस चालतो. मात्र हा कालावधी कुटुंबाचा आकार आणि स्वयंपाकाच्या सवयींवर अवलंबून असतो.
बहुतांश शहरांमध्ये PNG चा दर 45 ते 50 रुपये प्रति एससीएम दरम्यान असतो. जर महिन्याला 15 एससीएम वापर झाला, तर बिल सुमारे 700 रुपये येते. तर LPG सिलेंडरची किंमत 800 ते 1100 रुपयांदरम्यान असते. त्यामुळे दोन्हींचा एकूण खर्च जवळपास समानच आहे.
PNG मध्ये एक मोठा फायदा म्हणजे 24 तास सतत गॅस पुरवठा उपलब्ध असतो. सिलेंडर संपण्याची चिंता नसते. तर LPG मध्ये वेळोवेळी सिलेंडर बुक करावा लागतो आणि बदलावा लागतो.
स्थिर राहणाऱ्या आणि शहरात पाइपलाइन सुविधा असलेल्या लोकांसाठी PNG हा उत्तम पर्याय आहे. मात्र जे लोक वारंवार स्थलांतर करतात किंवा भाड्याच्या घरात राहतात, त्यांच्यासाठी LPG अधिक सोयीस्कर आहे.
PNG आणि LPG दोन्हींचा खर्च साधारण सारखाच असला तरी वापराच्या पद्धतीनुसार फरक पडतो. सुविधा, सातत्य आणि बिलिंगच्या दृष्टीने PNG थोडा फायदेशीर आहे, तर पोर्टेबिलिटीमुळे LPG अनेकांसाठी योग्य पर्याय आहे.