देशातील वाहनचालकांना 1 जुलैपासून मोठा दिलासा मिळाला आहे. भारतातील खासगी क्षेत्रातील सर्वात मोठी इंधन विक्रेता कंपनी नायरा एनर्जी (Nayara Energy) ने पेट्रोलच्या दरात प्रति लिटर 5 रुपयांची, तर डिझेलच्या दरात प्रति लिटर 3 रुपयांची कपात केली आहे.
नवीन दर 1 जुलै पासून देशभरातील कंपनीच्या पेट्रोल पंपांवर लागू झाले आहेत. मध्यपूर्वेतील तणाव कमी झाल्याने आणि आंतरराष्ट्रीय बाजारात कच्च्या तेलाच्या (क्रूड ऑइल) किमती घसरल्यामुळे हा निर्णय घेण्यात आला आहे.
रशियाच्या रोसनेफ्ट समर्थित नायरा एनर्जीने नुकतेच भारतातील आपल्या पेट्रोल पंपांची संख्या 7,000 च्या पुढे नेली आहे. त्यामुळे खासगी क्षेत्रातील सर्वात मोठी इंधन विक्रेता कंपनी म्हणून नायराने स्थान मिळवले आहे.
कंपनीने देशभरातील 7,000 हून अधिक पेट्रोल पंपांवर पेट्रोल 5 रुपये आणि डिझेल 3 रुपये प्रति लिटरने स्वस्त केले आहे. मात्र, प्रत्येक राज्यातील व्हॅट (VAT) आणि स्थानिक करांनुसार अंतिम दरात काहीसा फरक असू शकतो.
एकीकडे नायरा एनर्जीने दर कमी करून ग्राहकांना दिलासा दिला असला, तरी इंडियन ऑइल (IOC), भारत पेट्रोलियम (BPCL) आणि हिंदुस्तान पेट्रोलियम (HPCL) या सरकारी तेल कंपन्यांनी आपल्या इंधन दरात कोणताही बदल केलेला नाही.
उदाहरणार्थ, दिल्लीमध्ये IOC च्या पेट्रोल पंपावर पेट्रोलचा दर ₹102.12 प्रति लिटर, तर डिझेलचा दर ₹95.20 प्रति लिटर इतकाच कायम आहे.
यापूर्वी अमेरिका-इराण संघर्षामुळे आंतरराष्ट्रीय बाजारात कच्च्या तेलाच्या किमती मोठ्या प्रमाणात वाढल्या होत्या. त्यावेळी 26 मार्च 2026 रोजी नायरा एनर्जीने पेट्रोल 5 रुपये आणि डिझेल 3 रुपये प्रति लिटरने महाग केले होते. आता जागतिक परिस्थिती सुधारल्यानंतर कंपनीने तितकीच कपात करून ग्राहकांना दिलासा दिला आहे.
नायरा एनर्जी गुजरातमधील वाडीनार येथे दरवर्षी सुमारे 20 दशलक्ष टन क्षमता असलेली तेल रिफायनरी चालवते. मध्यपूर्वेतील तणाव कमी झाल्यानंतर आणि होर्मुझ सामुद्रधुनी (Hormuz Strait) पुन्हा खुली झाल्याने कच्चे तेल आणि द्रवरूप नैसर्गिक वायू (LNG) यांचा पुरवठा सुरळीत झाला आहे. त्यामुळे जागतिक बाजारात कच्च्या तेलाच्या किमती घसरल्या असून त्याचा थेट फायदा ग्राहकांना इंधन दरकपातीच्या रूपाने मिळत आहे.