Raul John Aju’s Inspiring Success Story: अवघ्या 16व्या वर्षी अनेक विद्यार्थी आपल्याला भविष्यात नेमकं काय करायचं, कोणत्या क्षेत्रात करिअर करायचं याचा विचार करत असतात. मात्र केरळमधील राउल जॉन अजू याने या वयातच स्वतःची AI स्टार्टअप कंपनी उभी केली आहे. विशेष म्हणजे, तो 12वीत शिकत असतानाच सुमारे 15 कर्मचाऱ्यांची टीम सांभाळत असून, आपल्या कंपनीत काम करणाऱ्या वडिलांनाच दरमहा तब्बल 2 लाख रुपयांचा पगार देतो.
राउलने आतापर्यंत 15 हून अधिक AI आधारित प्रॉडक्ट्स विकसित केले आहेत. विविध वृत्तांनुसार, त्याने सुमारे 5 लाख विद्यार्थ्यांना आणि शिकणाऱ्यांना प्रशिक्षण देण्याचे कामही केले आहे. एवढ्या कमी वयात मोठं यश मिळवूनही राउल मात्र सतत शिकत राहण्यावर भर देत आहे. तंत्रज्ञानाइतकंच लोकांच्या अनुभवातून शिकणं महत्त्वाचं असल्याचं तो सांगतो.
राउलला AIची आवड वयाच्या अवघ्या 9व्या वर्षी निर्माण झाली. त्याचे वडील टेक क्षेत्रात काम करत असल्याने त्याला लहानपणापासूनच आधुनिक तंत्रज्ञान आणि प्रीमियम टेक उपकरणांचा वापर करण्याची संधी मिळाली. याच माध्यमातून त्याने तंत्रज्ञान कसं काम करतं, त्याचा वापर कुठे होतो आणि AI ची क्षमता काय आहे, हे समजून घेण्यास सुरुवात केली.
यानंतर त्याने AI आणि सर्च टेक्नॉलॉजीबाबत अधिक अभ्यास केला. हळूहळू त्याने प्रयोग केले आणि AI च्या माध्यमातून प्रत्यक्ष समस्या सोडवण्याच्या दृष्टीने त्याने काम सुरू केले. याच प्रवासातून त्याच्या AI स्टार्टअपची पायाभरणी झाली.
राउल केवळ 12 वर्षांचा असताना त्याने शाळेच्या प्रोजेक्टसाठी ‘MeBot’ या रोबोटची निर्मिती केली होती. त्यानंतर त्याने MeBot, RESQ AI, ZapGap, Investo AI आणि FeedFye यांसारख्या अनेक AI प्रॉडक्ट्सवर काम केले. राउलच्या प्रोजेक्ट्सची खासियत म्हणजे केवळ तंत्रज्ञानाचं प्रदर्शन करण्याऐवजी सामान्य लोकांना भेडसावणाऱ्या प्रत्यक्ष समस्या सोडवण्यासाठी AI चा उपयोग करण्यावर त्याचा भर राहिला आहे.
आज राउल 12वीत शिकत असतानाही सुमारे 15 कर्मचाऱ्यांची टीम असलेली कंपनी सांभाळत आहे. या टीममध्ये त्याचे वडील अजू जोसेफ यांचाही समावेश आहे. राउल आपल्या वडिलांना कंपनीतील कामासाठी दरमहा तब्बल 2 लाख रुपयांचा पगार देतो. ही बाब अनेकांना वेगळी वाटू शकते. मात्र राउलच्या मते, आपल्या वडिलांच्या अनेक दशकांच्या कॉर्पोरेट अनुभवातून शिकण्याची ही एक मोठी संधी आहे.
अजू जोसेफ यांनी Amazon, Adobe, Wipro आणि IBM यांसारख्या मोठ्या कंपन्यांमध्ये काम केले आहे. त्यामुळे त्यांचा अनुभव राउलसाठी अत्यंत महत्त्वाचा आहे. एखाद्या व्यक्तीचा अनेक वर्षांचा व्यावसायिक अनुभव एका रात्रीत किंवा केवळ मोबाइलवरून शिकता येत नाही, असं राउलचं म्हणणं आहे.
वडिलांसोबत काम करताना मोठ्या टेक कंपन्या कशा चालतात, त्यांची वाढ कशी होते आणि व्यवसायातील निर्णय कसे घेतले जातात, हे समजण्यास मदत होत असल्याचेही तो सांगतो. विशेष म्हणजे, वडील कंपनीत असल्यामुळे आपल्या मार्केटिंगसाठीही त्याचा फायदा होतो, असे त्याने गंमतीने म्हटले आहे.
स्वतः कंपनीचा संस्थापक आणि प्रमुख असला तरी राउलला आपल्या अनुभवाच्या मर्यादा चांगल्या प्रकारे माहिती आहेत. आपण जे जाणतो त्यापेक्षा इतरांच्या अनुभवातून अजून खूप काही शिकता येऊ शकतं, यावर त्याचा विश्वास आहे. म्हणूनच वयाने लहान असला, कंपनीचा बॉस असला, तरी शिकण्याची तयारी असणे हेच त्याच्या यशामागचं मोठं कारण मानलं जात आहे.
राउलच्या कामाची दखल केवळ स्थानिक पातळीवरच नव्हे, तर राष्ट्रीय आणि आंतरराष्ट्रीय स्तरावरही घेण्यात आली आहे. त्याचा प्रवास आता शाळेच्या वर्गखोल्या आणि स्टार्टअपच्या कार्यालयापुरता मर्यादित राहिलेला नाही.
नवी दिल्ली येथे आयोजित 2026 इंडिया AI इम्पॅक्ट समिटमध्ये त्याने संयुक्त राष्ट्रांच्या AI आणि मुलांच्या सुरक्षिततेशी संबंधित एका सत्रात सहभाग घेतला आणि उद्घाटनपर भाषणही केले. या वेळी त्याने संयुक्त राष्ट्रांचे विशेष दूत अमनदीप गिल यांची भेट घेतली तसेच संयुक्त राष्ट्रांचे महासचिव अँटोनियो गुटेरेस यांच्याशीही संवाद साधला.
अवघ्या 16व्या वर्षी शाळेचं शिक्षण सांभाळत AI स्टार्टअप उभा करणारा, 15 हून अधिक AI प्रॉडक्ट्स विकसित करणारा आणि वडिलांसोबत काम करून त्यांच्याकडून शिकणारा राउल जॉन अजू आजच्या तरुण पिढीसाठी प्रेरणादायी उदाहरण आहे.