नवी दिल्ली, पुढारी वृत्तसेवा : संरक्षण मंत्री राजनाथ सिंग यांच्याशी द्विपक्षीय चर्चा करण्यासाठी अमेरिकेचे संरक्षण मंत्री लॉईड ऑस्टीन आणि जर्मनीचे संरक्षण फेडरल मंत्री बोरीस पिस्टोरियस भारत दौऱ्यावर येणार आहेत. सोमवारी (दि. ५) संरक्षण मंत्री राजनाथ सिंग हे अमेरिकचे संरक्षण मंत्री ऑस्टीन यांची भेट घेतली. तर, जर्मनीचे संरक्षण मंत्री पिस्टोरियस यांच्याशी ते ६ जूनरोजी चर्चा करतील. संरक्षण विषयक द्विपक्षीय सहकार्याच्या अनेक विषयांवर या बैठकांमध्ये चर्चा होण्याची शक्यता असून त्यात औद्योगिक सहकार्यावर लक्ष केंद्रीत करण्यात येणार असल्याचे संरक्षण मंत्रालयाने स्पष्ट केले आहे.
अमेरिकन संरक्षणमंत्री ऑस्टीन दुसऱ्यांदा भारताच्या दौऱ्यावर असून यापूर्वी ते मार्च २०२१ मध्ये भारतात आले होते. जर्मन संघराज्याचे संरक्षण मंत्री भारताच्या चार दिवसांच्या दौऱ्यावर आहेत. इंडोनेशियातून ते भारतात येतील. संरक्षणमंत्री राजनाथ सिंग यांच्य़ाशिवाय नवी दिल्लीत आयोजित करण्यात आलेल्या संरक्षण क्षेत्रातील उत्कृष्टता विषयक नवोन्मेष कार्यक्रमात अनेक संरक्षण संबंधी स्टार्ट अप्सच्या प्रमुखांनाही ते भेटण्याची शक्यता आहे. ७ जूनरोजी ते मुंबईला भेट देणार असून पश्चिम नौदल कमांडच्या मुख्यालयालाही तसेच माझगाव डॉक शिपबिल्डर्स लिमिटेडलाही भेट देण्याची शक्यता आहे.
हेही वाचा