पुणे : पुढारी वृत्तसेवा : आगामी आठवडा राज्यात प्रखर उष्णतेची लाट सक्रिय होत असून हवामान शास्त्रज्ञांनी सावधानतेचा इशारा दिला आहे. प्रामुख्याने रायगड, ठाणे, पालघर, मुंबई, रत्नागिरी, सिंधुदुर्ग या जिल्ह्यांत उष्ण व दमट वातावरणामुळे उष्माघाताचा अलर्ट देण्यात आला आहे. दरम्यान रविवारी राज्यातील बहुतांश शहरांचे कमाल तापमान ४१ अंशांवर होते. वाशिम शहराचा पारा सर्वाधिक ४३ अंशांवर पोहोचला होता. राज्यातील अवकाळी पावसाची शक्यता कमी झाली आहे. त्यामुळे बहुतांश भागात शुष्क अन् कोरडे वातावरण आहे, त्यामुळे कमाल तापमानात मोठी वाढ झाली आहे. बहुतांश शहरांचे सरासरी कमाल तापमान 41 ते 42 अंशांवर गेले आहे. तर विदर्भ अन् मध्यमहाराष्ट्रातील काही शहरांचे तापमान रविवारी 43 अंशांवर गेले होते.
पुणे वेधशाळेचे निवृत्त विभागप्रमुख डॉ. अनुपम कश्यपी यांनी सांगितले की, गुजरातमधील वाळवंटातून महाराष्ट्रात यंदा सतत उष्ण वारे येत आहेत. त्याचा परिणाम कोकण, उत्तर व मध्य महाराष्ट्रावर जास्त होत आहे. त्यामुळे या भागात उष्णतेची लाट तीव्र होत आहे. त्यामुळे ठाणे, रायगड, पालघर, मुंबई, रत्नागिरी, सिंधुदुर्गला उष्ण लाटांचा अलर्ट दिला आहे.
वाशिम 43, पुणे 41, मुंबई 33, अहमदनगर 40, जळगाव 41.5, कोल्हापूर 38.7, महाबळेश्वर 32.9, मालेगाव 42, नाशिक 40.1, सांगली 40.5, सातारा 39.1, सोलापूर 42, छत्रपती संभाजीनगर 39.2, परभणी 41.5, नांदेड 42.4, बीड 41.2, अकोला 41.4, अमरावती 40, चंद्रपूर 42.8, गोंदिया 37.6, नागपूर 39.7, वाशिम 43, वर्धा 41.4.
हेही वाचा