निपाणी : निपाणी शहर व उपनगरात एकामागोमाग एक बंद घरे फोडण्याचा सपाटाच चोर-दरोडेखोरांनी लावला असून सोमवारी बिरोबा माळ परिसरात उद्योजक सुनीलकुमार वडगावे यांचा बंगला भरदिवसा फोडून 18 तोळे सोन्या-चांदीचे दागिने, रोख 15 हजार असा सुमारे 24 लाखांचा ऐवज लंपास केला.
तिजोरीचा ड्रॉवरच घेऊन तीन बुरखाधारी दरोडेखोरांनी एकाच दुचाकीवरून पलायन केले. पाठलागाचा प्रयत्न करणार्या काही जणांना त्या तिघांनी कोयत्याचा धाकही दाखवला. त्यामुळे पोलिसांसमोर हे एक आव्हान बनले आहे. घटनास्थळी नागरिकांनी मोठी गर्दी केली होती. भरदिवसा घडलेल्या या घटनेमुळे परिसरात खळबळ उडाली आहे.
पोलिसांनी दरोडेखोरांचे सीसीटीव्ही चित्रण मिळवत तपास चालविला आहे. विशेष म्हणजे आठवड्यातील ही तिसरी घटना आहे. आतापर्यंत चोरट्यांनी चार घरफोड्या करून 45 तोळे सोने लांबविल्याने तपास यंत्रणेची झोप उडाली आहे.
अधिक माहिती अशी : उद्योजक सुनीलकुमार वडगावे हे मूळचे यरनाळचे. काही वर्षांपासून बिरोबा माळ परिसरातील व्यायाम शाळेच्या मैदानाशेजारी ते गंगा निवास या बंगल्यात राहतात. सोमवारी सकाळी ते बंगल्याला कुलूप लावून पत्नी पुष्पांजली, आई सुमन यांना कारमधून घेऊन बँकेच्या कामासाठी शहरात गेले होते. बँकेत पोचेपर्यंत 15 मिनिटांत त्यांना त्यांच्या घरी चोरी झाल्याचा फोन शेजार्यांकडून आला. वडगावे यांनी बंगल्याकडे धाव घेतली.
त्याआधी दरोडेखोरांनी वडगावे यांच्या बंगल्यासमोर असलेल्या गेटवरून उडी मारत आतमध्ये प्रवेश करून पुढील दाराचे कुलूप लोखंडी पारेच्या साह्याने उचकटून बंगल्यात प्रवेश केला. आतील तिजोरी फोडून दरोडेखोरांनी तिजोरीच्या ड्रॉवरमधील ऐवज व रोकड पाहून ड्रॉवरच उचलला. ते दुसर्या मजल्यावर जाण्याचा प्रयत्न करत असतानाच बंगल्याससमोरून ये-जा करणार्या नागरिकांसह वाहनधारकांचा सुगावा त्यांना लागला. ते बाहेर आले असता, बाहेर काही लोक जमले होते.
हे लक्षात येताच काही अंतरावर दुचाकी घेऊन थांबलेल्या एका साथीदारासमवेत तिघेजण हातात कोयता घेऊन पसार झाले. या मार्गावरून जाणार्या चोरट्यांच्या दुचाकीची रिक्षाला व रिक्षाची दुसर्या दुचाकीस्वाराला धडक बसल्याने एकजण खाली कोसळल्याने जखमीही झाला. तरीही दरोडेखोर पलायन करण्यात यशस्वी ठरले.
काय काय लांबवले?
दरोडेखोरांनी 3 तोळ्याचा लक्ष्मी हार, 3 तोळ्याची मोहनमाळ, 3 तोळ्याचे गंठण, 3 तोळ्याच्या पाटल्या, रिंगजोड लक्ष्मी हार, 5 ग्रॅम सोन्याची आणि चांदीची नाणी शिवाय चांदीची लक्ष्मी व गणेशमूर्ती तसेच रोख 15 हजार असा ऐवज लांबवला आहे. रात्री उशिरा वडगावे यांनी दिलेल्या फिर्यादीनुसार शहर पोलिसांनी गुन्हा दाखल करून तपास चालवला आहे.
आठवड्यातील तिसरी घटना
निपाणी परिसरातील चोरी-दरोड्याची आठवड्यातील ही तिसरी घटना आहे. चोरट्यांनी अष्टविनायक नगर व पंतनगर येथे तीन घरे व सोमवारी वडगावे यांचे घर अशी एकूण चार घरे फोडून 45 तोळे सोने व रोकड लांबविली आहे.
अन् गंभीर घटना टळली...
सुनीलकुमार वडगावे हे बँकेच्या कामासाठी फक्त पत्नीला घेऊन जाणार होते. मात्र अचानक त्यांनी आईलाही सोबत घेतले. वडगावे आईला न घेता पत्नी समवेत बँकेत गेले असते तर चोरट्यांकडून त्यांच्या आईला धोका होता.
एकाच पद्धतीने घरफोड्या
गत आठवड्यात मंगळवारी अष्टविनायक नगरमध्ये माजी सैनिक राजू घाटगे यांचा बंगला फोडताना चोरट्यांनी गेटचे कुलूप न तोडता उडी मारूनच आतमध्ये प्रवेश केला होता. तसेच लोखंडी पारेचा वापर करून कुलूप उचकटून घरात प्रवेश मिळवला होता. अशाच प्रकारे चोरट्यांनी सोमवारी वडगावे यांच्या बंगल्यासमोर असलेल्या गेटवरून उडी घेत पुढील दरवाजाचे कुलूप तोडून आतमध्ये प्रवेश केला. त्यामुळे घरफोडी करण्याची ही चोरट्यांची पद्धत सारखीच असल्याचे दिसते.
बेळगावहून श्वानपथक
घटनेची माहिती मिळताच डीएसपी गोपाळकृष्ण गौडर, पीआय बी. एस. तळवार, उपनिरीक्षक शिवानंद कार्जोळ, एलसीबी पथकाचे शेखर असोदे, शिवानंद सारवाड, उमेश माळगे घटनास्थळी धाव घेतली. घटनेचे गांभीर्य ओळखून बेळगावहून ठसे तज्ञांसह श्वानपथकास पाचारण करण्यात आले. श्वान सदाशिव गुरव यांच्या दुकानापर्यंत जाऊन घुटमळले.
दरोडेखोर कोल्हापूर परिसरातील?
सीसीटीव्ही फुटेजच्या आधारे निपाणी पोलिसांनी दरोडेखोरांचा माग काढण्यासाठी विशेष पथकाची स्थापना केली आहे. दुचाकीवरून कोयता घेऊन बुरखा बांधून आलेले तिघे चोरटे हे कोल्हापूर परिसरातील असावेत, असा पोलिसांचा प्राथमिक अंदाज आहे. त्या दिशेने तपास सुरू आहे.