बेळगाव; पुढारी वृत्तसेवा : महाराष्ट्र एकीकरण युवा समिती सीमाभागचे अध्यक्ष शुभम शेळके (Shubham Shelke) यांच्या हद्दपारीवरील पुढील सुनावणी २१ एप्रिलरोजी होणार आहे. न्याय दंडाधिकारी म्हणून पोलीस उपायुक्त रोहन जगदीश यांच्या समोर आज (दि.७) सुनावणी झाली. यावेळी शेळके यांच्या वतीने अॅड. महेश बिर्जे यांनी हद्दपारीच्या प्रस्तावावर आक्षेप नोंदविताना शेळके यांच्यावर सात गुन्ह्यांपैकी दोन गुन्ह्यांत न्यायालयाने निर्दोष मुक्तता केल्याचे निदर्शनास आणून दिले. (Belgaum News)
माळमारुती पोलीस स्थानकाचे निरीक्षक जे. एम. कालिमिर्ची यांनी शेळके यांच्यावर बेळगाव जिल्हा बंदी व हद्दपारीचा प्रस्ताव पोलीस उपायुक्त रोहन जगदीश यांच्याकडे 22 मार्चरोजी ठेवला होता, तशी नोटीस शेळके यांना 28 मार्च रोजी देण्यात आली होती.
दरम्यान, उर्वरित गुन्हे न्यायालयासमोर न्यायासाठी प्रलंबित आहेत, असे असताना जर कारवाई झाली. तर हे घटनेने दिलेल्या अधिकाराचे व कायद्याने घालून दिलेल्या संविधानाचे उल्लंघन असून माळमारुती पोलीस स्थानकाने केलेली कार्यवाही ही बेकायदेशीर आहे, असा आक्षेप अॅड. बिर्जे नोंदविला.
या सुनावणी वेळ अॅड. बाळासाहेब कागणकर, अॅड. रिचमॅन रिकी, अॅड. वैभव कुट्रे, अॅड. अश्वजित चौधरी, धनंजय पाटील, मनोहर हुंदरे, नगरसेवक शिवाजी मंडोळकर, प्रवीण रेडेकर, विजय जाधव, अशोक घगवे, चंद्रकांत पाटील, सुरज जाधव, मोतेश बार्देशकर, अभिषेक कारेकर आदी उपस्थित होते.