गेल्या दोन दिवसांपूर्वी बारामती तालुका पोलीस ठाण्याच्या हद्दीत असणाऱ्या मॅकडॉल कंपनीमधून दारुच्या बॉक्सचा ६५ लाख ८७ हजारांचा माल घेऊन जाणाऱ्या ट्रकचा अपघात झाला होता. उंडवडी कडेपठार या ठिकाणी या ट्रकचा अपघात करून ४० लाखांच्या चोरीचा बनाव करून नंदकुमार क्षिरसागर (रा. गोतोंडी, ता. इंदापुर, जि. पुणे) याच्या मदतीने ट्रकमधील दारुचे ५०० बॉक्स असा ४० लाखांचा माल एका गोडाऊनमध्ये ठेवण्यात आला होता. मात्र, त्यांचा बनाव उघडकीस आला आहे.
चालक अंकुश बेंद्रे (रा. बारामती, ता. बारामती ) व मालक अजिनाथ जराड (रा. बारामती) दोघांविरोधात अपघात करून ४० लाखांच्या चोरीचा बनाव बनाव करून अपहार केल्याचा गुन्हा तालुका पोलिसांनी दाखल केला.
पोलिसांनी दिलेल्या माहितीनुसार, दोन दिवसांपूर्वी बारामती तालुक्यातील उंडवडी येथे दारू वाहतूक करणारा ट्रक पलटी झाल्याची घटना घडली होती.
या अनुषंगाने पोलिस निरीक्षक महेश ढवाण यांनी गुन्हे शोध पथकाला तपासाचे आदेश दिले होते. उंडवडी येथे घडलेल्या अपघाताची माहिती घेतली असता, चालकाला विचारलेल्या प्रश्नांवरून संशय निर्माण झाल्याने गुन्हे शोध पथकाने ट्रक कंपनीमधून निघाल्यापासून रोडचे सीसीटीव्ही फुटेज तपासले.
यामध्ये ट्रक हा पहिल्यांदा भवानीनगर या दिशेने गेल्याचे निदर्शनास आले. त्यावरून गुन्हे शोध पथकाने कसून चौकशी केली असता, फिर्यादींनी स्वतः च्या आर्थिक फायद्यासाठी अपघाताचा बनाव करत,
त्याचा मित्र नंदकुमार क्षीरसागर (रा. गोतोंडी, ता. इंदापूर, जि. पुणे) याच्या गोडाऊनमध्ये तब्बल ५०० दारूचे बॉक्स असा ४० लाखांचा माल ठेवण्यात आला आणि उंडवडी मधून जात असताना ट्रॅकला अपघात झाल्याचे भासवले. यासाठी ट्रॅक पलटी करून गावातील लोकांनी दारूचा मुद्देमाल उचलून नेल्याची फिर्याद दिली होती.
गुन्हे शोध पथकाने सखोल तपास करत, अपहार केलेला ४० लाखांचा माल हस्तगत केला असुन, या गुन्ह्यात दोघांना अटक करण्यात आली आहे. ही कामगिरी पुणे ग्रामीण पोलीस अधीक्षक डॉ. अभिनव देशमुख, अप्पर पोलीस अधीक्षक मिलिंद मोहिते,
उपविभागीय पोलीस अधिकारी गणेश इंगळे, तालुका पोलीस निरीक्षक महेश ढवाण यांच्या मार्गदर्शनाखाली पोलीस उपनिरीक्षक खरात, गुन्हे शोध पथकाचे पोलीस अंमलदार राहुल पांढरे, नंदू जाधव, विजय वाघमोडे, विनोद लोंखंडे, सदाशिव बंडगर, अनिकेत शेळके यांनी केली आहे.