मृत्युंजय दूतांमुळे वाचले 1634 प्राण !

पुणे :  पुढारी वृत्तसेवा :  महामार्ग पोलिसांच्या राज्यातील 5 परिक्षेत्रामध्ये झालेल्या 1918 अपघातांमध्ये 1634 जणांचे प्राण 'हायवे मृत्युंजय दूतां'मुळे वाचले आहेत. या मृत्युंजय दूतांनी केलेल्या गोल्डन अवर मदतीमुळे हे शक्य झाले असून, महामार्ग पोलिसांकडून त्यांच्या कामाचे कौतुक केले जात आहे. महामार्गावर होणार्‍या अपघातातील अपघातग्रस्तांना गोल्डन अवरमध्ये मदत मिळावी, याकरिता महामार्ग पोलिसांकडून महामार्गाजवळच राहणार्‍या ढाबेवाले, गॅरेजवाले, स्थानिक रहिवासी, संस्था, संघटनांचे पदाधिकारी, कर्मचार्‍यांची 'मृत्युंजय दूत' म्हणून नेमणूक करण्यात आली आहे. सध्या राज्यभरातील महामार्ग पोलिसांच्या 5 परिक्षेत्रामध्ये 3 हजार 605 मृत्युंजय दूत कार्यरत आहेत. त्यांनी आतापर्यंत रस्ते अपघातामध्ये अनेक अपघातग्रस्तांना गोल्डन अवरमध्ये मदत केली आहे.

अपघातग्रस्तांना मदत केली, तर पोलिस विनाकारण आपल्या मागे लागतील. आपल्याला त्रास देतील, विनाकारण चौकशीचे सत्र सुरू होईल. त्यामुळे अनेक नागरिक अपघातग्रस्तांना मदत करत नाहीत. मात्र, अपघातग्रस्ताला जर मदत केली तर कोणत्याही पोलिसाला तुम्हाला थांबवून तुमची चौकशी करण्याचे, त्रास देण्याचा अधिकार नाही. याउलट अपघातग्रस्ताला मदत केल्यास संबंधिताला बक्षीसदेखील दिले जात आहे.

महामार्ग पोलिसांकडून मृत्युंजय दूतांना यापूर्वी अपघातग्रस्तांना कशी मदत करावी, याचे प्रशिक्षण देण्यात आले आहे. आणखी एकदा ते देण्यात येणार आहे. यात अपघात झाल्या झाल्या अपघातग्रस्ताला गाडीतून बाहेर कसे काढायचे, अपघातस्थळी बॅरिकेडिंग कसे करायचे,  जवळच्या रुग्णालयाशी संपर्क कसा साधायचा, महामार्ग पोलिसांशी संपर्क कसा साधायचा, रुग्णावर प्राथमिक तातडीचे उपचार कसे करावेत, ते मिळण्यासाठी काय करावे, याचे प्रशिक्षण दिले जाणार आहे, असे राज्याचे अतिरिक्त पोलिस महासंचालक डॉ. सिंगल यांनी दै. 'पुढारी'ला सांगितले.

महामार्ग पोलिसांच्या पुणे विभागात अपघातग्रस्तांना मदत करण्यासाठी 1004 मृत्युंजय दूत आहेत. महामार्ग पोलिस अधीक्षक लता फड यांच्या मार्गदर्शनाखाली हे मृत्युंजय दूत कार्यरत आहेत. यशवंतराव चव्हाण द्रुतगती मार्ग (एक्स्प्रेस वे), जुना मुंबई-पुणे महामार्ग, सातारा रस्ता, सोलापूर, नगर रस्ता या मार्गांवर हे कार्यरत आहेत.