पुणे : पुढारी वृत्तसेवा : महाराष्ट्र राज्य माध्यमिक व उच्च माध्यमिक शिक्षण मंडळातर्फे दहावीची परीक्षा मार्चमध्ये घेण्यात येणार आहे. या परीक्षेसाठीचे हॉलतिकीट राज्य मंडळाकडून उद्या बुधवार (दि.31 जानेवारी) पासून ऑनलाइन उपलब्ध करून देण्यात येणार आहे. शाळांनी कोणतेही शुल्क न घेता हॉलतिकीट विद्यार्थ्यांना उपलब्ध करून द्यावे, असे राज्य मंडळाच्या सचिव डॉ. अनुराधा ओक यांनी स्पष्ट केले आहे. दहावीची प्रात्यक्षिक, श्रेणी, तोंडी आणि अंतर्गत मूल्यमापन परीक्षा 10 फेब्रुवारीपासून सुरू होत आहे. तर लेखी परीक्षा 1 ते 26 मार्च या कालावधीत होणार आहे. या अनुषंगाने विद्यार्थ्यांना हॉलतिकीट उपलब्ध करून देण्यात आले आहे. राज्य मंडळाने दिलेल्या माहितीनुसार कोणतेही अतिरिक्त शुल्क न घेता हॉल तिकिटाची प्रत डाऊनलोड करून त्यावर प्राचार्यांचा शिक्का मारून विद्यार्थ्यांना उपलब्ध करून द्यायचे आहे. हॉलतिकीटमध्ये विषय, माध्यम बदल असल्यास त्याच्या दुरुस्त्या शाळा- कनिष्ठ महाविद्यालयांनी विभागीय मंडळात जाऊन करून घ्यायच्या आहेत.
हॉलतिकीटवरील विद्यार्थ्याचे नाव, छायाचित्र, स्वाक्षरी याबाबतच्या दुरुस्त्या शाळा- कनिष्ठ महाविद्यालयांनी त्यांच्या स्तरावर करून त्याची प्रत विभागीय मंडळाकडे त्वरित पाठवायची आहे. छायाचित्र सदोष असल्यास त्यावर विद्यार्थ्याचे छायाचित्र चिकटवून प्राचार्यांनी त्यावर शिक्का मारून स्वाक्षरी करायची आहे. हॉलतिकीट गहाळ झाल्यास शाळांनी पुन्हा हॉलतिकीटची प्रत घेऊन त्यावर लाल शाईने द्वितीय प्रत असा शेरा मारून ती विद्यार्थ्यांना द्यायची आहे, असेही स्पष्ट करण्यात आले आहे.
