बँकॉक : महाराष्ट्रासह भारतात अनेक ठिकाणी गणेशोत्सव भक्तिभावाने साजरा केला जातो. मात्र, गणेश भक्त केवळ भारतातच नसून संपूर्ण जगभर आहेत. जगातील अनेक देशांमध्ये गणेशांची आराधना केली जाते. थायलंडमध्ये तर गणपती बाप्पाची तब्बल बारा मजली इमारतीइतकी उंच मूर्ती आहे. आस्थेचे प्रतीक म्हणून ही भव्यदिव्य मूर्ती उभारण्यात आली आहे.
भारतापासून हजारो किलोमीटर दूर असलेल्या थायलंडमधील ही गणेशमूर्ती सर्वांचे लक्ष वेधून घेते. तिथे गणपतीला एक अनोखे सांस्कृतिक महत्त्व आहे. थायलंडचे लोक आपल्या घरांमध्ये, विद्यापीठांमध्ये आणि अगदी कार्यालयांमध्येही गणपतीच्या मूर्तींची स्थापना करतात. येथील लोक गणपतीला यश, बुद्धी आणि संरक्षणाची देवता मानतात. थायलंडच्या चाचोएंगसाओ प्रांतात ही जगातील सर्वात उंच गणेश मूर्ती आहे.
या मूर्तीची भव्यता पाहून सर्वचजण अचंबित होतात. ही मूर्ती सुमारे ३९ मीटर म्हणजेच १२५ फूट उंच आहे. एकूण उंची पाहता ही मूर्ती १२ मजली इमारती इंतकी उंच आहे. ख्लोंग खुएन गणेश आंतरराष्ट्रीय उद्यानात, बांग पाकोंग नदीच्या काठावर ही गणेश मूर्ती आहे. ही मूर्ती कांस्य धातूची असून, ती ८५४ वेगवेगळ्या भागांपासून बनलेली आहे. या मूर्तीचे बांधकाम पूर्ण होण्यासाठी चार वर्षे लागली. २०१२ मध्ये या भव्य मूर्तीचे काम पूर्ण झाले. ही मूर्ती इतकी उंच आहे की, दूरवरूनही लक्ष वेधून घेते. पिटक चालेउमलाव यांनी ही मूर्ती डिझाईन केली आहे.
गणेशाची ही प्रतिमा विशेष प्रतीकात्मक अर्थाने कोरलेली आहे. गणेशाच्या चार हातांमध्ये ऊस, फणस, केळे आणि आंबा आहे, जे समृद्धी आणि प्रगती दर्शवतात. गणेशाचा पुढे आलेला पाय राष्ट्राची प्रगती आणि प्रगतीच्या भावनेचे प्रतीक आहे. मुकुटावरील कमळाचे फूल ज्ञानाचे प्रतीक आहे. मूर्तीच्या शीर्षस्थानी असलेले ‘ओम’ चिन्ह त्याचे देवत्व आणि संरक्षक स्वभावाची आठवण करून देते. आता हे एक जगप्रसिद्ध धार्मिक स्थळ बनले आहे. थाई संस्कृती आणि आध्यात्मिकतेचे एक प्रभावी प्रतीकदेखील आहे.
