वॉशिंग्टन : जगात अनेक रहस्यमय आणि आश्चर्यकारक ठिकाणे आहेत; पण तुम्ही कधी अशा जागेबद्दल ऐकले आहे का, जिथे इतकी शांतता आहे की, तुम्हाला तुमच्या शरीराच्या आतले आवाजही स्पष्ट ऐकू येऊ लागतील? होय, हे खरं आहे. ही जागा म्हणजे मायक्रोसॉफ्टच्या वॉशिंग्टन येथील मुख्यालयात बनवलेली एक विशेष खोली, जिला ‘अॅनेकोईक चेंबर’ (Anechoic Chamber) म्हणून ओळखले जाते.
या खोलीला जगातील सर्वात शांत खोली म्हणून ‘गिनीज बुक ऑफ वर्ल्ड रेकॉर्ड’मध्ये स्थान मिळाले आहे. या खोलीची रचना अशाप्रकारे करण्यात आली आहे की, बाहेरील जगाचा कोणताही आवाज आत पोहोचू शकत नाही. इतकेच नाही, तर खोलीच्या आतील आवाजही भिंतींवर आदळून परत येत नाही, ज्यामुळे ही खोली पूर्णपणे निःशब्द (Soundproof) बनते. जेव्हा एखादी व्यक्ती या खोलीत प्रवेश करते, तेव्हा काही क्षणातच तिला आपल्या हृदयाची धडधड, हाडांच्या एकमेकांना घासण्याचा आवाज आणि अगदी श्वास घेण्याचा सूक्ष्म ध्वनीही ऐकू येऊ लागतो. या खोलीत थोडा वेळ थांबल्यानंतर काहींना अस्वस्थता किंवा भीती वाटू शकते; कारण मानवी मेंदूला इतक्या शांततेची सवय नसते.
या खोलीच्या निर्मितीसाठी मायक्रोसॉफ्टला तब्बल दीड वर्षापेक्षा जास्त कालावधी लागला. हे चेंबर काँक्रीट आणि स्टीलच्या सहा विशेष थरांपासून बनवण्यात आले आहे. तसेच, यात ध्वनी शोषून घेणारी अनेक उपकरणे बसवण्यात आली आहेत, जी कोणत्याही प्रकारचा आवाज शोषून घेतात. या खोलीत उभे राहून अगदी हळू आवाजात कुजबुजले तरी तो आवाज खूप मोठा वाटतो. या खोलीचा मुख्य वापर मायक्रोसॉफ्ट आपली ऑडिओ उपकरणे, जसे की मायक्रोफोन, स्पीकर आणि इतर इलेक्ट्रॉनिक उपकरणांची ध्वनी चाचणी (Sound Testing) करण्यासाठी करते. या खोलीत उपकरणांच्या आवाजाची अचूक गुणवत्ता तपासता येते. काही लोकांनी असाही दावा केला आहे की, या खोलीत जास्त वेळ राहिल्यास मानसिक अस्वस्थता जाणवू शकते, ज्यामुळे ही जागा जितकी आकर्षक आहे, तितकीच रहस्यमयही ठरते.
