न्यूयॉर्क : ‘लहान तोंडी मोठा घास’ ही म्हण या महिलेच्या बाबतीत गैरलागू आहे. अमेरिकेत राहणार्या मेरी पर्ल झेल्मर रॉबिन्सनने असा पराक्रम केला आहे की, तो पाहून तुमचे तोंड उघडेल! जगातील सर्वात मोठे तोंड उघडण्याच्या बाबतीत गिनिज वर्ल्ड रेकॉर्डमध्ये तिची नोंद झाली आहे. मेरीच्या म्हणण्यानुसार, तिचे तोंड सामान्य माणसांपेक्षा खूप मोठे आहे, अशी तिला लहानपणापासूनच भावना होती. जेव्हा ती तोंड उघडते तेव्हा तिच्या दातांमध्ये इतके अंतर असते की तिची संपूर्ण जीभ स्पष्ट दिसते. मेरीने हा अनोखा विक्रम तर केलाच, शिवाय तोंडात 10 पॅटीज असलेला बर्गर फिट करून सर्वांना आश्चर्याचा धक्का दिला. गिनिज वर्ल्ड रेकॉर्डने पोस्ट केलेल्या व्हिडीओमध्ये ती कधी पॅटीज तर कधी बेसबॉल तोंडात बसवताना दिसत आहे.
मेरी पर्ल गेलमर रॉबिन्सनच्या तोंडाची रुंदी 7.62 सेंटीमीटर (2.98 इंच) होती, तर मागील रेकॉर्डधारक सामंथा रॅम्सडेलचा 2.56 इंचाचा विक्रम होता, जो तिने 2021 मध्ये स्थापित केला होता. मेरी सांगते, ‘माझ्या जबड्याचा पोत असा आहे की जेव्हा मी तोंड उघडते तेव्हा तो सामान्य माणसांप्रमाणे स्नायूंना मारत नाही. म्हणूनच मी इतरांपेक्षा मोठ्या आकारात तोंड उघडू शकते.’
मेरीने पुढे सांगितले की, तिने एके दिवशी इंटरनेटवर एक व्हिडीओ पाहिला, ज्यात सर्वात मोठ्या तोंडाच्या पुरुष आणि महिला रेकॉर्डधारकांबद्दल बोलले गेले. त्यावेळी तिला वाटले की ती हा विक्रम मोडेल. ‘जेव्हा माझे तोंड मोजले गेले तेव्हा मला जाणवले की मी हा विक्रम सहज पार करू शकतो. त्यावेळी रेकॉर्ड अडीच इंचांचा होता आणि माझे तोंड त्यापेक्षा अर्धा इंच जास्त होते.’ मेरीला तिच्या या कामगिरीचा अभिमान आहे. आता आपले नाव आपल्या शहरातील इतर विक्रमधारकांशीही जोडले गेल्याने त्यांना आनंद होत आहे. विशेष म्हणजे अशा प्रकारचा विक्रम बनवणे ही एक मोठी गोष्ट आहे.
