सॅन फ्रान्सिस्को : आर्टिफिशियल इंटेलिजन्स (एआय) च्या वाढत्या क्षमतेबाबत एक अत्यंत आश्चर्यकारक आणि धक्कादायक प्रकार समोर आला आहे. ‘ओपन एआय' ने खुलासा केला आहे की, त्यांच्या अंतर्गत चाचणीदरम्यान एका प्रगत 'एआय' मॉडेलने मानवी हस्तक्षेपाशिवाय स्वतःच्या बळावर दुसऱ्या 'एआय' कंपनीच्या, अर्थात 'हगिंग फेस'च्या सिस्टीममध्ये घुसखोरी केली. 'एआय' च्या इतिहासातील ही आतापर्यंतची सर्वात असामान्य सायबर घटना मानली जात आहे.
'ओपन एआय' च्या मते, नियंत्रित चाचणीदरम्यान कोणत्याही मानवी सूचनेशिवाय एका 'एआय' मॉडेलने दुसऱ्या कंपनीच्या सिस्टीममध्ये यशस्वीपणे प्रवेश करण्याची ही पहिलीच वेळ असू शकते. कंपनीने दिलेल्या माहितीनुसार, ही घटना त्यांच्या अंतर्गत सायबर सुरक्षा मूल्यांकनादरम्यान घडली. या चाचणीत GPT-5.6 Sol सह अनेक प्रगत 'एआय' मॉडेल्सचा समावेश होता. या मॉडेल्सच्या सायबर क्षमता तपासण्यासाठी त्यांना मर्यादित इंटरनेट ॲक्सेस असलेल्या एका वेगळ्या चाचणी वातावरणात चालवले जात होते. या चाचणीदरम्यान, 'एआय' मॉडेलने सॉफ्टवेअरमधील एका अज्ञात त्रुटीचा (Zero-day vulnerability) फायदा घेतला.
याच्या साहाय्याने त्याने इंटरनेटचा मार्ग शोधला आणि हगिंग फेसच्या सिस्टीममध्ये प्रवेश मिळवला. 'ओपन एआय'ने दिलेल्या माहितीनुसार, हगिंग फेसच्या टीमने गेल्या आठवड्यात ही असामान्य हालचाल ओळखली आणि वेळीच ती रोखली. दुसरीकडे, 'ओपन एआय'च्या सिक्युरिटी टीमनेही या मॉडेलच्या संशयास्पद हालचालींचा शोध घेतला होता. कंपनीचे म्हणणे आहे की, 'एआय' मॉडेलचा उद्देश कोणताही तोटा किंवा नुकसान पोहोचवणे हा नव्हता. प्राथमिक तपासात असे दिसून आले आहे की, हे मॉडेल सायबर सुरक्षा बेंचमार्कशी संबंधित प्रश्नांची उत्तरे शोधण्याचा प्रयत्न करत होते. 'ओपन एआय'चे सीईओ सॅम ऑल्टमन यांनी सोशल मीडिया प्लॅटफॉर्म 'X' वर या घटनेची पुष्टी केली आहे.
