वॉशिंग्टन : रोबो कसा असावा, याबद्दलचा शास्त्रज्ञांचा पारंपरिक द़ृष्टिकोन बदलू शकणारा एक अजब आणि वैशिष्ट्यपूर्ण रोबो संशोधकांनी तयार केला आहे. तब्बल 20 पाय असलेला हा रोबो भविष्यातील रोबोटिक्स तंत्रज्ञानाला एक नवीन दिशा देण्याची शक्यता आहे.
गेल्या अनेक दशकांपासून रोबोटिक्स तज्ज्ञ निसर्गातून प्रेरणा घेऊन मानव, कुत्रे, कीटक आणि घोड्यांसारखे दिसणारे रोबो बनवत आले आहेत. परंतु, एका नवीन संशोधनानुसार, माणसासारखा दिसणारा रोबो असण्यापेक्षा ‘सी अर्चिन’ (Sea Urchin - एक गोल, काटेरी सागरी जीव) सारखा दिसणारा रोबो अधिक उपयुक्त ठरू शकतो, असे समोर आले आहे. या रोबोला समोरची किंवा मागची अशी कोणतीही ठराविक बाजू नाही. त्याच्या मध्यवर्ती भागातून 20 टेलिस्कोपिक (आकुंचन-प्रसरण पावणारे) पाय बाहेर पडतात. यातील प्रत्येक पायाची किंमत सुमारे 300 डॉलर्स आहे. विशेष म्हणजे, प्रत्येक पायाच्या टोकावर एक डेप्थ कॅमेरा बसवला आहे. सर्व दिशांना पाहण्याच्या या क्षमतेमुळे संशोधकांनी ग्रीक पौराणिक कथेतील ‘सर्व काही पाहू शकणार्या’ राक्षसावरून त्याचे नाव ‘आर्गस’ असे ठेवले आहे.
हा रोबो कोणत्याही दिशेला सहजपणे हालचाल करू शकतो. कोणी धक्का दिला किंवा टक्कर झाली, तरी स्वतःचा तोल सांभाळण्यात तो सक्षम आहे. हा रोबो खडकाळ आणि दुर्गम भागातून प्रवास करू शकतो, भिंतींवर चढू शकतो आणि सुमारे 4.5 किलोग्रॅम (10 पाउंड) वजनाचे पेलोड वाहून नेऊ शकतो. ड्युक युनिव्हर्सिटीच्या शास्त्रज्ञांनी या रोबोची निर्मिती केली असून, त्यांचे हे संशोधन 27 मे रोजी ‘सायन्स रोबोटिक्स’ या प्रसिद्ध जर्नलमध्ये प्रकाशित झाले आहे. ड्युक युनिव्हर्सिटीच्या जनरल रोबोटिक्स लॅबमधील डॉक्टरेट विद्यार्थी आणि या अभ्यासाचे सह-लेखक जियाक्सुन लिऊ म्हणाले, ‘आर्गसला चालताना पाहणे हा एक वेगळाच अनुभव आहे. जेव्हा आम्ही त्याला पहिल्यांदा झाडांच्या मधून आणि खडकाळ जमिनीवरून, अनेक धक्के बसूनही यशस्वीपणे चालताना पाहिले, तेव्हाच आम्हाला समजले की हे काहीतरी वेगळे आणि खास आहे.’
