मॉस्को : रशियातील सेंट पीटर्सबर्ग शहर हे तिथल्या जुन्या वास्तू, अप्रतिम वास्तुकला आणि युरोपीय शैलीसाठी ओळखले जाते. मात्र, सध्या या शहरातील एक अवाढव्य निवासी संकुल (रेसिडेन्शियल कॉम्प्लेक्स) सोशल मीडियावर जोरदार चर्चेत आहे. या चर्चेमागचे कारण कोणती ऐतिहासिक इमारत किंवा प्रसिद्ध पर्यटन स्थळ नसून, तेथे उभारलेली एक विशाल निवासी सोसायटी आहे. व्हिडीओसोबत केलेल्या दाव्यानुसार, या विशाल निवासी संकुलात सुमारे ५,५४५ कुटुंबे राहतात. एका कुटुंबात सरासरी काही व्यक्ती मानल्या तरीही येथे राहणाऱ्यांची एकूण लोकसंख्या कित्येक हजारांच्या घरात पोहोचते. हीच गोष्ट या जागेला सर्वसामान्य अपार्टमेंटपेक्षा वेगळी ठरवते. इतक्या मोठ्या प्रमाणावर लोकसंख्येच्या निवासासाठी केवळ फ्लॅटस् बनवणे पुरेसे नसते; तर त्यांच्या दैनंदिन गरजांसाठी दुकाने, रस्ते, उद्याने आणि इतर सुविधांचीही आवश्यकता असते.
इन्स्टाग्रामवर शेअर केलेल्या एका व्हिडीओमध्ये हे कॉम्प्लेक्सवरून दाखवण्यात आले आहे. कॅमेरा जसा जसा उंचावरून खाली येतो, तसा या इमारतींचा विस्तार पाहून ही कॉलनी नेमकी किती मोठी आहे, याचा अंदाज लावणे कठीण होते. दूरवर पसरलेल्या इमारती, त्यांच्यामधून जाणारे रस्ते आणि धावणाऱ्या गाड्या यामुळे हा संपूर्ण परिसर एखाद्या सायन्स फिक्शन चित्रपटातील दृश्यासारखा दिसतो. या व्हायरल व्हिडीओचे सर्वात मोठे वैशिष्ट्य म्हणजे त्याचा वरून घेतलेला व्ह्यू (टॉप व्ह्यू). उंचावरून पाहिल्यास संपूर्ण कॉलनी एका मोठ्या चक्रव्यूहासारखी दिसते. एकामागे एक उभारलेल्या उंच इमारती आणि त्यांच्यामधून जाणारे रस्ते पाहून हा एखाद्या कॉम्प्युटर गेममधील किंवा भविष्यातील दुनियेतील शहराचा भाग असल्याचा भास होतो. खाली उभ्या असलेल्या गाड्या आणि रस्त्यावरून चालणारे लोकही अगदी लहान दिसतात. याच कारणामुळे व्हिडीओ पाहणाऱ्या अनेक युजर्सनी या परिसराला सामान्य निवासी भागापेक्षा एखादे ‘मेगा सिटी’ म्हटले आहे. इतक्या मोठ्या निवासी संकुलाचे सर्वात मोठे वैशिष्ट्य म्हणजे येथे राहणाऱ्या लोकांच्या गरजा पूर्ण करण्यासाठी संकुलाच्या आसपासच अनेक सुविधा उपलब्ध असतात. अशा मोठ्या कॉम्प्लेक्समध्ये दुकाने, पार्क आणि दैनंदिन वापराच्या सुविधा असल्याने लोकांना प्रत्येक छोट्या गोष्टीसाठी दूर जावे लागत नाही. प्रचंड लोकसंख्या एकाच ठिकाणी राहत असल्यामुळे येथील वातावरणही एखाद्या लहान शहरासारखे जाणवते. म्हणजेच सकाळी घरातून निघून मुलांनी शाळेत जाणे, लोकांनी कामावर जाणे, खरेदी करणे आणि संध्याकाळी पार्कमध्ये वेळ घालवणे या सर्व गोष्टी एकाच मोठ्या निवासी परिसराच्या आत पार पडतात.
