वॉशिंग्टन : अमेरिकेतील 50 वर्षांखालील व्यक्तींमध्ये ‘कोलोरेक्टल कॅन्सर’ (मोठ्या आतड्याचा किंवा गुदाशयाचा कर्करोग) हा मृत्यूचे सर्वात मोठे कारण बनला आहे, असे एका नवीन अभ्यासातून समोर आले आहे. याला ‘बाऊल कॅन्सर’ असेही संबोधले जाते.
‘अमेरिकन कॅन्सर सोसायटी’ने (अउड) प्रसिद्ध केलेल्या आकडेवारीनुसार, 2013 पासून 50 वर्षांखालील व्यक्तींमध्ये या कर्करोगाचे प्रमाण वाढत आहे, तर 2004 पासून या वयोगटातील मृत्युदरातही वाढ झाली आहे. प्रगत अवस्थेत या आजाराचे निदान होत असल्याने हा धोका अधिक गंभीर बनला आहे. अभ्यासाचे सह-लेखक रेबेका सीगल आणि डॉ. अहमदिन जेमल यांनी सांगितले की, ‘हा कल अत्यंत चिंताजनक आहे. 50 वर्षांखालील व्यक्तींमध्ये मृत्युदर वाढत असलेला हा एकमेव सामान्य कर्करोग आहे.’ 50 ते 64 वयोगटातील व्यक्तींमध्येही या कर्करोगाचे प्रमाण वाढत असून, त्याचे निदान उशिरा होत आहे. याउलट, 65 वर्षांवरील व्यक्तींमध्ये या कर्करोगाचे प्रमाण आणि त्यामुळे होणारे मृत्यू कमी होत आहेत. मोठ्या वयोगटातील ही घट तरुण पिढीमधील वाढत्या धोक्याला झाकून टाकत आहे. कोलोरेक्टल कॅन्सर हा जागतिक स्तरावर कर्करोगामुळे होणाऱ्या मृत्यूंचे दुसरे सर्वात मोठे कारण आहे. डॉ. जेमल यांच्या मते, ‘हा आता केवळ वृद्धांचा आजार राहिलेला नाही.’ 2025 च्या विश्लेषणानुसार अमेरिका, कॅनडा, ऑस्ट्रेलिया आणि इंग्लंडसह 14 देशांमध्ये तरुणांमधील या कर्करोगाचे प्रमाण वेगाने वाढत असल्याचे दिसून आले आहे. संशोधकांनी 1998 ते 2022 या काळातील नवीन केसेस आणि 1930 ते 2023 या काळातील मृत्यूंच्या आकडेवारीचे सखोल विश्लेषण केले. यासाठी ‘नॅशनल कॅन्सर इन्स्टिट्यूट’ आणि ‘सीडीसी’ (उऊउ) कडून मिळालेल्या अधिकृत माहितीचा आधार घेण्यात आला आहे.
