क्लीव्हलँड : दुग्धश्वेत (मिल्की व्हाईट) संगमरवरी दगडापासून बनवलेली, एका महिलेची लहान आणि अमूर्त आकाराची मूर्ती सध्या जागतिक स्तरावर कुतूहलाचा विषय बनली आहे. या मूर्तीचे डोके पाठीमागच्या बाजूला झुकलेले असून तिचे डोळे आकाशाकडे पाहात असल्यासारखे वाटतात, म्हणूनच या मूर्तीला 'द स्टारगेझर' (The Stargazer - तारे पाहणारी) या नावाने ओळखले जाते.
कला इतिहासकार अमांडा मिकोलिक यांच्या मते, जगभरात या प्रकारच्या केवळ ३० मूर्ती आजवर सापडल्या आहेत. या सर्व मूर्ती इसवी सन पूर्व ३००० (सुमारे ५००० वर्षांपूर्वीच्या) काळातील असून, त्या अशा संस्कृतीने तयार केल्या आहेत, ज्यांनी या मूर्तींच्या अर्थाविषयी कोणताही लेखी दस्तऐवज किंवा नोंद ठेवलेली नाही. विशेष म्हणजे, या विशिष्ट 'स्टारगेझर’ मूर्तीचे मालक एकेकाळी अमेरिकेचे माजी उपराष्ट्राध्यक्ष (जेरॉल्ड फोर्ड यांच्या कार्यकाळात) आणि प्रसिद्ध दानशूर व्यक्ती नेल्सन रॉकफेलर हे होते. सध्या ही मूर्ती 'क्लीव्हलँड म्युझियम ऑफ आर्ट'च्या संग्रहात जतन करून ठेवण्यात आली आहे.
ही संगमरवरी मूर्ती साधारणपणे ६.८ इंच (१७.२ सेंटीमीटर) उंच असून तिचे वजन सुमारे १ पाऊंड (४५४ ग्रॅम) आहे. मानवी रूपात कोरलेल्या या मूर्तीला तोंड (ओठ) नाही. तिच्या कंबरेखालील कोरलेल्या रेषांवरून ही एका महिलेची मूर्ती असल्याचे स्पष्ट होते. तिचे मोठे, लंबगोलाकार डोके मागे झुकलेले असून तिचे लहान, ठिपक्यासारखे डोळे वर आकाशाकडे पाहात आहेत. सध्याच्या तुर्कस्तानमधील (प्राचीन काळातील पश्चिम अनातोलिया) उत्खननात सापडलेल्या बहुतांश स्टारगेझर मूर्ती हजारो वर्षांपूर्वी जमिनीत गाडण्यापूर्वी गळ्यापाशी तुटलेल्या अवस्थेत होत्या.
या पार्श्वभूमीवर क्लीव्हलँड म्युझियममधील ही मूर्ती अत्यंत सुरक्षित आणि पूर्ण अवस्थेत सापडलेल्या सर्वोत्तम कलाकृतींपैकी एक मानली जाते. ही मूर्ती नेमकी कशाचे प्रतिनिधित्व करते, याबद्दल अद्याप स्पष्टता नाही. मिकोलिक यांच्या मते, ही मूर्ती स्वतःहून सरळ उभी राहू शकत नाही, याचा अर्थ ती हातात धरण्यासाठी किंवा जमिनीवर सपाट ठेवण्यासाठी तयार करण्यात आली असावी. त्या लिहितात, "ती मुद्दाम स्त्री रूपात तयार केली असल्याने, तिचा संबंध जननक्षमता आणि समृद्धीशी असू शकतो."
