वॉशिंग्टन : पाहताच क्षणी एखाद्या बहुढंगी कलाकृतीसारखी वाटणारी ही मनमोहक प्रतिमा प्रत्यक्षात अंतराळातून पृथ्वीवर पडलेल्या एका दुर्मीळ उल्केच्या तुकड्याची आहे. शास्त्रज्ञांच्या मते, हा सुंदर खडक अब्जावधी वर्षांपूर्वीच्या आपल्या सुरुवातीच्या सूर्यमालेतील एखाद्या ‘हरवलेल्या जगाचा’ म्हणजेच नष्ट झालेल्या प्राचीन ग्रहाचा भाग असू शकतो.
हा फोटो सामान्य कॅमेऱ्याने घेतलेला नसून, पोलराइज्ड लाईट मायक्रोस्कोपच्या सहाय्याने घेतलेला उल्केचा एक अतिशय पातळ छेद आहे. यामध्ये दिसणारे चमकदार निळे, हिरवे आणि केशरी रंग हे त्या खडकामध्ये असलेल्या विविध खनिजांचे अस्तित्व दर्शवतात. या सप्तरंगी रचनेमुळेच हा तुकडा एखाद्या काचेच्या खेळण्यासारखा सुंदर दिसत आहे. शास्त्रज्ञांनी केलेल्या संशोधनानुसार, हा तुकडा सौरमालेच्या सुरुवातीच्या काळातील आहे, म्हणजेच जेव्हा ग्रहांची निर्मिती होत होती.
अब्जावधी वर्षांपूर्वी सूर्यमालेत अनेक छोटे-मोठे ग्रह अस्तित्वात होते, जे नंतर झालेल्या अवकाशीय टक्करांमुळे नष्ट झाले किंवा इतर ग्रहांमध्ये सामावून गेले. हा खडकाचा तुकडा अशाच एका प्राचीन, नष्ट झालेल्या ग्रहाचा भाग असावा, ज्याला संशोधकांनी ‘हरवलेले जग’ असे संबोधले आहे. या उल्केचा अभ्यास खगोलशास्त्रज्ञांसाठी अत्यंत महत्त्वाचा ठरत आहे. या खडकातील खनिजांची रचना पाहून शास्त्रज्ञांना सूर्यमालेच्या सुरुवातीच्या काळात ग्रहांची निर्मिती कशी झाली, तिथले तापमान कसे होते आणि रासायनिक प्रक्रिया कशा घडत गेल्या, हे समजून घेण्यास मदत होत आहे.
