वॉशिंग्टन : अंतराळवीरांनी अंतराळातून टिपलेल्या एका नयनरम्य छायाचित्रामध्ये दक्षिण अमेरिकेतील पॅटागोनिया प्रदेशातील एक अनोखे दृश्य समोर आले आहे. एका प्राचीन हिमनदीच्या तलावाचे नैसर्गिक जमिनीच्या पुलामुळे दोन भाग झाले असून, या दोन्ही तलावांच्या पाण्याचा रंग एकमेकांपासून पूर्णपणे वेगळा आणि अतिशय आकर्षक दिसत आहे.
चित्रामध्ये डाव्या बाजूला दिसणारा ‘प्युएरेडॉन तलाव’ हा अर्जेंटिना आणि चिली देशांच्या सीमेवर पसरलेल्या सुमारे ४० मैल (६५ किलोमीटर) लांब हिमनदीय तलावाचा अर्जेंटिनामधील भाग आहे. या तलावातील पाणी अत्यंत स्वच्छ आणि सुमारे १,६०० फूट (५०० मीटर) खोल आहे. त्यामुळे अंतराळातून पाहिल्यास हे पाणी गडद निळ्या रंगाचे दिसते. हजारो वर्षांपूर्वी प्युएरेडॉन तलावाच्या दक्षिण भागात गाळाचा एक मोठा थर साचल्याने ‘पोसादास तलाव’ हा नवीन लहान तलाव तयार झाला. नासाच्या अर्थ ऑब्झर्व्हेटरीनुसार, हा लहान तलाव उथळ आहे आणि जवळच्या नद्यांमधून मोठ्या प्रमाणात गाळ वाहून येत असल्याने या तलावातील पाण्याचा रंग फिकट हिरवा-निळा दिसतो. जवळच्या टेकड्यांमधून वाहणाऱ्या नद्यांनी आणलेल्या गाळामुळे येथे पंख्याच्या आकाराचे तीन त्रिभुज प्रदेश तयार झाले आहेत. वाऱ्याचा प्रवाह आणि लाटांमुळे गाळ पुढे ढकलला जाऊन जमिनीच्या बारीक पट्ट्या तयार झाल्या.
प्युएरेडॉन आणि पोसादास या दोन तलावांना वेगळा करणारा हा ‘लँड ब्रिज’ म्हणजे प्राचीन काळातील हिमनदीच्या कडांवर साचलेला दगड-मातीचा थर असावा, असा अंदाज वर्तवण्यात आला आहे. या भागात सर्वात लहान त्रिभुज प्रदेशावर एक छोटी धावपट्टी देखील आहे. हा भाग मुख्यत्वे मानवी वस्ती नसलेला असला तरी पर्यटकांमध्ये खूप लोकप्रिय आहे. निसर्गाचे हे विलोभनीय सौंदर्य पाहण्यासाठी, कॅम्पिंग, हायकिंग आणि कायकिंग करण्यासाठी जगभरातून पर्यटक या तलावांना भेट देतात.
