नवी दिल्ली : भारतीय रेल्वे सर्वसामान्यांसाठी स्वस्त आणि सोयीस्कर प्रवासासाठी ओळखली जाते. मात्र, काही ट्रेन्स अशाही आहेत ज्यांचा प्रवास खर्च आपल्या कल्पनेपलीकडचा असू शकतो. अशाच एका ट्रेनबद्दल आपण आज बोलणार आहोत, तिचे नाव आहे ‘पॅलेस ऑन व्हील्स.’ ही ट्रेन तिच्या आलिशान अनुभवासाठी आणि राजेशाही थाटामाटासाठी प्रसिद्ध आहे. तिचा प्रवास खर्चच तिला भारतातील सर्वात महागड्या ट्रेन्सपैकी एक बनवतो.
‘पॅलेस ऑन व्हील्स’ ही ट्रेन 7 दिवस आणि 8 रात्रींचा एक शानदार प्रवास घडवते. या संपूर्ण प्रवासासाठी तिकिटाची किंमत तब्बल 12 लाख रुपयांपासून सुरू होऊन सुमारे 39 लाख रुपये किंवा त्याहून अधिक असू शकते. ही किंमत तुम्ही निवडलेला केबिनचा प्रकार, जसे की डिलक्स, सुपर डिलक्स किंवा प्रेसिडेंशियल सुईट आणि प्रवासाचा हंगाम यावर अवलंबून असते. ‘पॅलेस ऑन व्हील्स’चा प्रवास नवी दिल्लीतून सुरू होतो आणि राजस्थानच्या प्रमुख राजेशाही शहरांमधून जातो. तिचा मार्ग साधारणपणे नवी दिल्ली - जयपूर - सवाई माधोपूर - चित्तोडगड - उदयपूर - जैसलमेर - जोधपूर - भरतपूर - आग्रा - नवी दिल्ली असा असतो.
हा प्रवास प्रवाशांना राजस्थानच्या समृद्ध संस्कृती आणि वारशाची ओळख करून देतो. ही ट्रेन केवळ प्रवास खर्चानेच नाही, तर तिच्या सुविधांमधूनही राजेशाही अनुभव देते. यामध्ये वातानुकूलित, अटॅच्ड बाथरूम असलेले आलिशान केबिन्स, एक किंवा दोन रेस्टॉरंटस्, एक बार लाऊंज आणि एक स्पा यासारख्या सुविधा मिळतात. प्रत्येक केबिन राजेशाही थाटात सजवलेला असतो, ज्यामुळे प्रवाशांना राजा-महाराजांप्रमाणे अनुभव मिळतो. ‘पॅलेस ऑन व्हील्स’ची सुरुवात भारतीय रेल्वे आणि राजस्थान पर्यटन विकास महामंडळ (RTDC) यांनी मिळून केली होती. ही ट्रेन पहिल्यांदा 26 जानेवारी 1982 रोजी चालवण्यात आली होती. ही भारतातील पहिली लक्झरी पर्यटक ट्रेन होती, जी खासकरून विदेशी पर्यटक आणि राजेशाही अनुभव घेऊ इच्छिणार्या प्रवाशांसाठी डिझाईन करण्यात आली होती.
