वॉशिंग्टन : कॅलिफोर्नियातील भयावह आगीत अनेक घरे, इमारती, झाडे जळून खाक झाली असून ही आग अद्यापही धुमसतच आहे. या दुर्घटनेचा परिणाम अकादमी पुरस्कार 2025 च्या म्हणजेच ऑस्कर पुरस्कार सोहळ्याच्या आयोजनावरही दिसून येत आहेत. ऑस्कर 2025 च्या नामांकनांची घोषणा आधीच दोनवेळा पुढे ढकलण्यात आली आहे. सुरुवातीला ही घोषणा 17 जानेवारी 2025 रोजी होण्याची अपेक्षा होती; परंतु ते 19 आणि नंतर 23 जानेवारीपर्यंत वाढवण्यात आले.
अकादमी पुरस्कारांमध्ये असलेल्या मोठ्या बदलांसोबतच अकादमीच्या सीईओ बिल क्रेमर आणि अध्यक्ष जेनेट यांग यांनी एक निवेदन जारी करून सर्व लोकांना एकजुटीचे महत्त्व सांगितले. ‘या कठीण काळात, अकादमी आणि चित्रपट उद्योगातील सर्व सदस्य एकत्र उभे राहतील. आम्ही आशा करतो की, या संकटकाळात प्रत्येक व्यक्तीने आपली भूमिका निभावली आणि सहकार्य केले,’ असे यांग आणि क्रेमर यांनी निवेदनात म्हटले. आग आणि इतर कारणांमुळे काही कार्यक्रमांचे वेळापत्रक बदलावे लागेल, याची जाणीव अकादमीलाही आहे. 97 व्या ऑस्कर पुरस्कार सोहळ्याच्या आयोजनाची तारीख 3 मार्च 2025 निश्चित करण्यात आलेली आहे; मात्र ऑस्करची तारीख बदलू शकते; परंतु त्यावर अद्याप अधिकृतपणे निर्णय घेतलेला नाही.
अकादमीने सांगितले आहे की, त्या तारखेला काही बदल होऊ शकतात. यावर्षी इतिहासात प्रथमच हा सोहळा रद्दही होऊ शकतो, असे म्हटले जात आहे; पण अधिकृत घोषणा झालेली नाही. हॉलिवूड आणि सिनेमा उद्योगाच्या द़ृष्टीने ही एक मोठी समस्या बनली आहे. एका बाजूला आगीने मोठे नुकसान होत आहे, तर दुसर्या बाजूला 2025 ऑस्करच्या तयारीसाठी ताणतणावदेखील वाढला आहे, असे असतानाही अकादमीने हा सोहळा होईल, याची खात्री देण्याचे आश्वासन दिले आहे; परंतु परिस्थितीवर सर्व काही अवलंबून राहिले आहे.
