वॉशिंग्टन; वृत्तसंस्था : हृदयविकार आणि स्ट्रोकचा धोका कमी करण्यासाठी कोलेस्ट्रॉल कमी करणारी औषधे तरुण वयातच सुरू करण्याचा विचार अधिक लोकांनी करावा, असे ताज्या वैद्यकीय मार्गदर्शक सूचनांमध्ये सांगण्यात आले आहे. नवीन मार्गदर्शक तत्त्वांनुसार, काही परिस्थितीत 30 वर्षांच्या वयापासूनच उपचार सुरू केल्यास आयुष्यभरातील हृदयविकाराचा धोका लक्षणीयरीत्या कमी होऊ शकतो.
अमेरिकेतील हृदयरोग तज्ज्ञांच्या संस्थांनी नुकत्याच प्रसिद्ध केलेल्या अद्ययावत मार्गदर्शक तत्त्वांमध्ये उच्च कोलेस्ट्रॉलवर लवकर उपचार करण्यावर भर देण्यात आला आहे. आतापर्यंत डॉक्टर रुग्णाच्या पुढील 10 वर्षांच्या हृदयविकाराच्या धोक्यावर लक्ष ठेवत उपचार सुचवत होते. मात्र, आता 30 वर्षांच्या कालावधीतील संभाव्य धोका लक्षात घेऊन उपचाराचा निर्णय घेण्याची शिफारस करण्यात आली आहे.
तज्ज्ञांच्या मते, जर एखाद्या व्यक्तीचे एलडीएल (वाईट) कोलेस्ट्रॉल 160 मिग्रॅ/डेसिलिटरपेक्षा जास्त असेल, कुटुंबात लवकर वयात हृदयरोगाचा इतिहास असेल किंवा पुढील 30 वर्षांत हृदयविकाराचा धोका जास्त असेल, तर जीवनशैलीत बदलांसोबत स्टॅटिन औषधे सुरू करण्याचा विचार केला जाऊ शकतो. स्टॅटिन ही औषधे एलडीएल कोलेस्ट्रॉल कमी करण्यासाठी मोठ्या प्रमाणावर वापरली जातात. एलडीएल कोलेस्ट्रॉल दीर्घकाळ जास्त राहिल्यास रक्तवाहिन्यांमध्ये प्लॅक जमा होऊन हृदयविकाराचा धोका वाढतो. तज्ज्ञांचे म्हणणे आहे की, तरुण वयात उपचार सुरू केल्यास हा प्लॅक तयार होण्याची प्रक्रिया मोठ्या प्रमाणात कमी करता येते.
तज्ज्ञांच्या मते, अनेक तरुणांमध्ये पुढील 10 वर्षांचा धोका कमी दिसतो; पण दीर्घकालीन म्हणजे 30 वर्षांचा धोका जास्त असू शकतो. त्यामुळे लवकर उपचार सुरू केल्यास आयुष्यभरातील एकूण कोलेस्ट्रॉलचा परिणाम कमी होतो आणि हृदयविकाराचा धोका घटतो. तथापि, उपचार सुरू करण्याचा अंतिम निर्णय डॉक्टर आणि रुग्ण यांच्या चर्चेनंतरच घेतला जातो. योग्य आहार, नियमित व्यायाम, वजन नियंत्रण आणि धूम्रपान टाळणे या जीवनशैलीतील बदलांसोबत औषधोपचार केल्यास हृदयाचे आरोग्य दीर्घकाळ टिकवणे शक्य असल्याचे तज्ज्ञांनी स्पष्ट केले आहे.
