नवी दिल्ली : कल्पना करा, अशी एक नोकरी आहे, जिथे तुम्हाला कामावर जाण्याची, मिटिंगची किंवा इतर कोणत्याही गोष्टीची चिंता नाही. तुम्हाला फक्त आरामशीरपणे झोपायचे आहे आणि त्यासाठी तुम्हाला भरघोस पगार मिळतो. हे ऐकायला विनोद वाटेल; पण ही एक खरी आणि दिवसेंदिवस लोकप्रिय होणारी नोकरी आहे. याला प्रोफेशनल स्लीपर किंवा व्यावसायिक झोप घेणारा असे म्हणतात. पण, प्रश्न हा आहे की या कामासाठी पगार कोण देतो आणि हे काम ऐकण्याइतके सोपे आहे का? चला, या अनोख्या नोकरीबद्दल सविस्तर जाणून घेऊया.
हे काम मुख्यत्वे विज्ञान आणि संशोधनाशी जोडलेले आहे. अनेक वैज्ञानिक संस्था आणि संशोधन केंद्रे झोपेवर संशोधन करतात. त्यासाठी त्यांना अशा लोकांची गरज असते, जे त्यांच्या प्रयोगांमध्ये सहभागी होतील. याशिवाय गादी, उशा आणि झोपेशी संबंधित इतर वस्तू बनवणार्या कंपन्यांना आपल्या उत्पादनांची चाचणी करण्यासाठी अशा व्यावसायिकांची गरज असते. याशिवाय नवीन औषधे किंवा तंत्रज्ञानाचा झोपेवर काय परिणाम होतो, हे तपासण्यासाठीही व्यावसायिक झोप घेणार्यांची मदत घेतली जाते. या नोकरीमध्ये व्यक्तीला वेगवेगळ्या वातावरणात, वेगवेगळ्या प्रकारच्या गाद्यांवर आणि उशांवर झोपावे लागते.
अनेकदा वैज्ञानिक एका विशिष्ट वातावरणाचा झोपेवर काय परिणाम होतो, हे तपासतात. झोपताना या व्यक्तींच्या डोक्याला आणि शरीराला काही उपकरणे जोडली जातात, जी त्यांच्या मेंदूची क्रिया, हृदयाची गती आणि श्वासोच्छ्वास मोजतात. झोपल्यानंतर त्यांना त्यांच्या अनुभवाबद्दल सविस्तर माहिती द्यावी लागते, जसे की, झोप किती शांत होती, काही त्रास झाला का, इत्यादी. हे काम ऐकायला सोपे वाटत असले तरी ते आव्हानात्मकही आहे. काही वेळा एकाच स्थितीत बराच वेळ झोपावे लागते, जे सोपे नसते.
या कामासाठी व्यक्तीची झोप सामान्य असावी लागते आणि त्याला आपले अनुभव स्पष्टपणे व्यक्त करता यायला हवेत. सध्या अमेरिका, बि—टन, जर्मनी आणि जपानसारख्या देशांमध्ये या नोकर्या जास्त प्रमाणात उपलब्ध आहेत. भारतात अजूनही हे काम फारसे सामान्य नाही; पण झोपेवर होणारे संशोधन वाढत असल्यामुळे भविष्यात या क्षेत्रात संधी निर्माण होण्याची शक्यता आहे. ही एक तात्पुरती आणि प्रोजेक्टवर आधारित नोकरी असते. त्यामुळे एक प्रकल्प पूर्ण झाल्यावर ती संपू शकते.
