लंडन : आपण आजवर पुस्तकांमध्ये किंवा चित्रपटांमध्येच गुप्त दरवाजे आणि त्यामागे लपलेल्या खजिन्याच्या गोष्टी ऐकल्या असतील. मात्र, ब्रिटनमधील एका दाम्पत्याच्या बाबतीत ही गोष्ट प्रत्यक्षात घडली आहे. शेफिल्ड शहरात राहणाऱ्या ३४ वर्षीय लुईसा आणि त्यांचे पती डॅन यांना त्यांच्या १०० वर्षे जुन्या व्हिक्टोरियन काळातील घरात एक अशी गुप्त गोष्ट सापडली, ज्याने त्यांच्या अडचणीच्या काळात मोठे आर्थिक सहकार्य केले.
२०२० मध्ये कोरोना महामारीच्या काळात ब्रिटनमध्ये कडक लॉकडाऊन लागू होता. या मोकळ्या वेळेत लुईसा आणि डॅन यांनी १९०० सालापूर्वी बांधलेल्या आपल्या ऐतिहासिक घराच्या नूतनीकरणाचे काम हाती घेतले. सफाई आणि दुरुस्तीदरम्यान डॅन यांचे लक्ष तळघराकडे जाणाऱ्या पायऱ्यांखालील एका विटांच्या भिंतीकडे गेले. काहीतरी वेगळे वाटल्याने त्यांनी ती भिंत तोडण्याचा निर्णय घेतला. भिंत तोडताच त्यांच्यासमोर अनेक वर्षांपासून बंद असलेली एक गुप्त खोली उघडली, ज्यामध्ये कोळशाचा मोठा ढीग साचला होता. कोळसा साफ करताना डॅन यांना तिथे एक जुना आणि पूर्णपणे गंजलेला लोखंडी डबा सापडला. सुरुवातीला त्यांनी त्याकडे दुर्लक्ष केले आणि तो डबा कित्येक महिने तसाच एका कोपऱ्यात पडून राहिला.
लुईसा यांनी दिलेल्या माहितीनुसार, त्या डब्यातून अमोनियासारखा तीव्र आणि विचित्र वास येत होता, ज्यामुळे तो उघडायला सगळेच घाबरत होते. मात्र, एके दिवशी उत्सुकतेपोटी पूर्ण कुटुंबाने एकत्र येऊन औजारांच्या मदतीने अत्यंत काळजीपूर्वक त्या डब्याचे झाकण उघडले. झाकण उघडताच सर्वांनाच मोठा धक्का बसला! डब्यात कोणतीही रद्दी नसून वृत्तपत्रे आणि कागदांच्या बंडलमध्ये गुंडाळलेल्या नोटांच्या थप्प्या होत्या. हे १९७० च्या काळातील ५ पौंडचे अस्सल जुन्या नोटांचे बंडल होते. जेव्हा सर्व नोटा मोजल्या गेल्या, तेव्हा ती रक्कम १,००० पौंड (सुमारे १.०५ लाख रुपये) पेक्षा जास्त निघाली. दाम्पत्याने त्या जुन्या नोटा वाळवून बँकेत जमा केल्या.
लुईसा यांच्या म्हणण्यानुसार, हा खजिना अगदी योग्य वेळी त्यांच्या हाती लागला. लॉकडाऊनच्या काळात त्यांची नोकरी गेली होती आणि कुटुंब मोठ्या आर्थिक अडचणींचा सामना करत होते. अचानक मिळालेल्या या पैशांमुळे त्यांना घरचे बिल भरणे आणि मुलांच्या गरजा पूर्ण करणे शक्य झाले. ब्रिटनमध्ये १९१९ पूर्वी बांधलेल्या घरांना मोठा इतिहास आहे. पूर्वीच्या काळात लोक बँकेत पैसे ठेवण्याऐवजी घरात कोळशाच्या ढिगाऱ्यामागे किंवा गुप्त भिंतींमध्ये रोकड आणि मौल्यवान वस्तू लपवून ठेवत असत. काळाच्या ओघात अनेकदा लोक हे पैसे विसरून जायचे, जे आता घर दुरुस्तीदरम्यान अशा प्रकारे समोर येतात.
