नवी दिल्ली : दुधी भोपळा ही एक अशी भाजी आहे जी भारत आणि चीनसह जगातील अनेक भागात उत्पादित होते. ती स्वादिष्ट असण्यासोबतच आरोग्याच्या द़ृष्टिकोनातूनही खूप फायदेशीर आहे. दुधीपासून भाजी, ज्यूस, कोफ्ता, पकोडा, खीर, हलवा, रायता असे विविध प्रकारचे पदार्थ बनवता येतात. हे पदार्थ केवळ स्वादिष्टच लागत नाहीत तर यामध्ये भरपूर पोषक तत्त्व देखील असतात. या दुधीचा रस हे नैसर्गिक ऊर्जा पेय म्हणून ओळखले जाते जे शारीरिक आणि मानसिक आरोग्यासाठी चांगले असते. वजन कमी करण्यासाठी हा ज्यूस फायद्याचा ठरू शकतो. दुधीमध्ये अतिशय पौष्टिक गुण असतात. यामध्ये फायबर आणि व्हिटॅमिन सी, बी 6, फोलेट, मॅग्नेशियम आणि पोटॅशियम यांसारखे अनेक महत्त्वाचे पोषक घटक मुबलक प्रमाणात आढळतात. हे पोषक तत्व आपल्या शरीराला निरोगी ठेवण्यासाठी महत्त्वाची भूमिका बजावतात. दुधीमध्ये अँटिऑक्सिडंट्स गुणधर्म देखील असतात, जे आपल्या शरीराची प्रतिकारशक्ती वाढवतात. दुधीच्या रसामध्ये भरपूर जीवनसत्त्वे आणि खनिजे असतात. हे शरीराला ऊर्जा देतात आणि विषारी पदार्थ काढून टाकण्यासही खूप मदत करतात.
दुधीचा रस पचनसंस्थेसाठी वरदान आहे. यामध्ये भरपूर फायबर असते, जे पचनसंस्था सुरळीत चालण्यास मदत करतात. याच्या नियमित सेवनाने बद्धकोष्ठता आणि पोटाशी संबंधित इतर समस्या दूर होतात. पोट निरोगी ठेवण्यासाठी दुधीचा रस देखील महत्त्वाची भूमिका बजावतो. यामध्ये भरपूर फायबर असते आणि त्यात कॅलरीज कमी असतात, ज्यामुळे तुम्हाला जास्त काळ पोट भरल्यासारखे वाटते आणि यामुळेच तुम्ही जास्त खाणे टाळल्याने भूक कमी होऊन वजन नियंत्रणात राहते. दुधीत असलेले पोटॅशियम रक्तदाब नियंत्रित करते, जे हृदयाच्या आरोग्यासाठी खूप फायदेशीर आहे, दुधीचा रस कोलेस्ट्रॉल संतुलित ठेवतो, ज्यामुळे हृदयविकाराचा धोका कमी होतो. अँटिऑक्सिडंट्सने समृद्ध दुधीच्या रसाचे नियमित सेवन केल्याने त्वचा हायड्रेट राहण्यास मदत होते, ज्यामुळे ती चमकदार राहते. ती त्वचेला मॉइश्चरायझ करते, ज्यामुळे सुरकुत्या कमी होतात. दुधी ही आरोग्यासाठी अतिशय फायदेशीर भाजी आहे. त्यात 92% पर्यंत पाणी असते, जे शरीराला हायड्रेट ठेवण्यास मदत करते. उन्हाळ्यात दुधीचा रस प्यायल्याने शरीराला नैसर्गिक थंडावा मिळतो. यामुळे तहान तर शमतेच पण शरीराचे तापमानही संतुलित राहते. दुधीचा रस तुमच्या मानसिक आरोग्यासाठीही खूप फायदेशीर आहे. यामध्ये असलेले पोषक तणाव कमी करण्यास आणि झोपेची गुणवत्ता सुधारण्यास मदत करतात. दुधीचा रस नियमित प्यायल्याने आपण मानसिकद़ृष्ट्या शांत आणि ताजेतवाने राहतो.
