नवी दिल्ली : टेक्नॉलॉजी क्षेत्रातील महासत्ता असलेल्या गुगलने 27 सप्टेंबर 2025 रोजी आपला 27 वा वाढदिवस उत्साहात साजरा केला. या निमित्ताने गुगलने आपल्या होमपेजवर खास डूडल प्रदर्शित केले, ज्यात कंपनीचा मूळ 1998 चा लोगो वापरून सुरुवातीच्या काळातील आठवणींना उजाळा देण्यात आला.
गुगलची स्थापना स्टॅनफोर्ड विद्यापीठातील पीएचडी विद्यार्थी लॅरी पेज आणि सर्गेई ब्रिनयांनी केली. एका गॅरेज-आधारित स्टार्टअपपासून आज ते अब्जावधी वापरकर्त्यांना सेवा देणारे जागतिक तंत्रज्ञान पॉवरहाऊस बनले आहे. गुगलचे पहिले नाव बॅकरब असे होते. 1997 मध्ये एका नाव निवडण्याच्या सत्रादरम्यान, संस्थापकांना एक असे नाव हवे होते जे त्यांच्या प्लॅटफॉर्मवर उपलब्ध असलेल्या अफाट माहितीच्या साठ्याला प्रतिबिंबित करेल.
गुगोल (Googol) या गणितीय शब्दाचा अर्थ 1 च्या पुढे 100 शून्य असा असतो. हे नाव माहितीच्या विशालतेला दर्शवत होते. स्टॅनफोर्डचा एक विद्यार्थी शॉन अँडरसन डोमेन उपलब्ध आहे की नाही हे तपासत असताना, त्याने ‘Googol’ ऐवजी चुकून ‘Google’ असे टाइप केले. लॅरी पेज यांना हे ‘चुकीचे’ नाव लगेच आवडले आणि काही तासांतच google.com डोमेनची नोंदणी करण्यात आली.
गुगलची अधिकृत नोंदणी 4 सप्टेंबर 1998 रोजी झाली असली तरी, कंपनी 2000 च्या दशकाच्या मध्यापासून 27 सप्टेंबर रोजी आपला वाढदिवस साजरा करते. हा दिवस गुगलच्या सर्च इंडेक्सच्या वाढीमधील एका महत्त्वपूर्ण टप्प्याचे प्रतीक आहे, जो प्लॅटफॉर्मचा वेगवान विस्तार दर्शवतो. आज गुगलचे साम्राज्य सर्चपुरते मर्यादित नसून, त्यात जीमेल, गुगल मॅप्स, क्रोम आणि यूट्यूब सारख्या अनेक सेवांचा समावेश आहे. 27 व्या वाढदिवसाचे डूडल हे कंपनीच्या यशाचा आणि एका साध्या गॅरेजमधून सुरू झालेल्या प्रवासाचा एक प्रेरणादायी नॉस्टॅल्जिया आहे.
