सनीवेल, कॅलिफोर्निया : तंत्रज्ञान क्षेत्रातील दिग्गज कंपनी गुगलने आपल्या रिअल इस्टेटमधील शाश्वत तत्त्वांचे दर्शन घडवणारे एक कार्यालय सुरू केलेले आहे. कॅलिफोर्नियातील सनीवेल येथे ‘1265 बोरेगास’ या नावाने ओळखली जाणारी ही इमारत गुगलची पूर्णपणे लाकडापासून बनवलेली पहिली इमारत ठरली आहे.
ही इमारत ‘मास टिंबर’ या विशेष प्रकारच्या इंजिनिअर्ड लाकडापासून तयार करण्यात आली आहे. यात लाकडाचे लहान तुकडे एकत्र जोडून मोठे बीम आणि भिंती तयार केल्या जातात. ही पद्धत केवळ मजबूतच नाही, तर पर्यावरणासाठीही अत्यंत फायदेशीर आहे. गुगलच्या या कार्यालयाची रचना आजच्या बदलत्या कार्यसंस्कृतीला अनुसरून करण्यात आली आहे: सहकार्य आणि एकाग्रता: यात कर्मचार्यांच्या सक्रिय सहकार्यासाठी ‘नेबरहुड स्पेसेस’ आणि शांतपणे काम करण्यासाठी विशेष जागा आहेत.
निसर्गाशी जवळीक : संशोधनानुसार, निसर्गाच्या सानिध्यात लोक अधिक चांगल्या प्रकारे काम करू शकतात. त्यामुळे इमारतीत लाकूड नैसर्गिक स्वरूपात ठेवले असून, मोठ्या खिडक्यांतून नैसर्गिक प्रकाश आणि बाहेरील निसर्गाचे दर्शन घडते.
स्वयंचलित सोयी : सूर्याच्या स्थितीनुसार बदलणारे ‘ऑटोमॅटिक लाकडी पडदे’ आणि जमिनीखालून येणारी हवा कर्मचार्यांना आरामदायी अनुभव देतात. कार्बन साठवणूक : लाकूड नैसर्गिकरीत्या कार्बन शोषून घेते. पारंपरिक स्टील आणि काँक्रीटच्या इमारतींच्या तुलनेत, या इमारतीत कार्बन उत्सर्जनाचे प्रमाण तब्बल 96 टक्क्यांनी कमी आहे.
प्रमाणित लाकूड : या इमारतीसाठी वापरलेले 100 टक्के लाकूड ‘फॉरेस्ट स्टुअर्डशिप कौन्सिल’ (FSC) द्वारे प्रमाणित केलेल्या जबाबदार जंगलांमधून मिळवण्यात आले आहे.
सौरऊर्जा आणि नेट-झिरो : ही इमारत पूर्णपणे विजेवर चालणारी (All- electric) असून तिला ‘LEED प्लॅटिनम’ मानांकन मिळाले आहे. इमारतीच्या छतावर सौर पॅनेल बसवण्यात आले आहेत.
