अमेरिकेची अंतराळ संस्था ‘नासा’ने बुधवारी (भारतीय वेळेनुसार गुरुवारी पहाटे) ऐतिहासिक ‘आर्टेमिस-2’ मोहिमेचे यशस्वी प्रक्षेपण केले. या मोहिमेद्वारे तब्बल 53 वर्षांनंतर पुन्हा एकदा मानवाला चंद्राच्या सफरीवर पाठवण्यात आले आहे. यापूर्वी 11 डिसेंबर 1972 रोजी ‘अपोलो 17’ मोहिमेंतर्गत मानवाने शेवटचे चंद्रावर पाऊल ठेवले होते. फ्लोरिडा येथील केनेडी स्पेस सेंटरवरून ‘ओरियन’ (Orion) हे अंतराळयान झेपावले असून, सध्या चार अंतराळवीरांसह हे यान पृथ्वीभोवती प्रदक्षिणा घालत आहे. यानंतर ते चंद्राच्या दिशेने मार्गस्थ होईल. ‘नासा’चे अंतराळवीर रीड वाईजमन, व्हिक्टर ग्लोव्हर, क्रिस्टीना कोच आणि कॅनडियन स्पेस एजन्सीचे जेरेमी हॅन्सन या 10 दिवसांच्या मोहिमेसाठी रवाना झाले आहेत. हे अंतराळवीर चंद्रावर उतरणार नाहीत, तर ते चंद्राभोवती प्रदक्षिणा घालून पुन्हा पृथ्वीवर परततील. या अंतराळवीरांची ही माहिती...
रीड वाईजमन (मोहीम कमांडर)
2009 : ‘नासा’चे अंतराळवीर म्हणून निवड.
शालेय शिक्षण : डुलानी हायस्कूल, टिमोनियम (1993).
पदवी : कॉम्प्युटर अँड सिस्टीम इंजिनिअरिंगमध्ये बॅचलर ऑफ सायन्स, रेनसेलर पॉलिटेक्निक इन्स्टिट्यूट (1997).
व्युत्पन्न पदवी (Master's): सिस्टीम इंजिनिअरिंगमध्ये मास्टर ऑफ सायन्स, जॉन्स हॉपकिन्स युनिव्हर्सिटी (2006).
विशेष : 2008 मध्ये स्पेस सिस्टीम्सचे प्रमाणपत्र प्राप्त.
व्हिक्टर ग्लोव्हर (पायलट)
2013 : ‘नासा’चे अंतराळवीर म्हणून निवड.
शालेय शिक्षण : ओंटारिओ हायस्कूल, कॅलिफोर्निया (1994).
पदवी : जनरल इंजिनिअरिंगमध्ये बॅचलर ऑफ सायन्स, कॅलिफोर्निया पॉलिटेक्निक स्टेट युनिव्हर्सिटी (1999).
व्युत्पन्न पदवी : फ्लाईट टेस्ट इंजिनिअरिंगमध्ये मास्टर ऑफ सायन्स, एअर युनिव्हर्सिटी (2007).
अतिरिक्त : सिस्टीम इंजिनिअरिंग आणि मिलिटरी ऑपरेशनल आर्ट अँड सायन्स या विषयांतही पदव्युत्तर शिक्षण पूर्ण.
क्रिस्टीना कोच (मिशन स्पेशालिस्ट)
2013 : ‘नासा’ची अंतराळवीर म्हणून नियुक्ती.
पदवी : इलेक्ट्रिकल इंजिनिअरिंग आणि फिजिक्समध्ये बॅचलर ऑफ सायन्स, नॉर्थ कॅरोलिना स्टेट युनिव्हर्सिटी.
व्युत्पन्न पदवी : इलेक्ट्रिकल इंजिनिअरिंगमध्ये मास्टर ऑफ सायन्स, युनिव्हर्सिटी ऑफ घाना.
विशेष : नॉर्थ कॅरोलिना स्टेट युनिव्हर्सिटीने त्यांना पीएच.डी.ची मानद पदवी देऊन गौरवले आहे.
जेरेमी हॅन्सन
हे ‘आर्टेमिस-2’ मोहिमेचे ‘मिशन स्पेशालिस्ट’ आहेत. चंद्राचा प्रवास करणारे ते पहिले कॅनडियन नागरिक ठरणार आहेत. अंतराळवीर बनण्यापूर्वी जेरेमी हे फायटर पायलट (लढाऊ विमान चालक) होते.
पदवी : त्यांनी 1999 मध्ये कॅनडातील ‘रॉयल मिलिटरी कॉलेज ऑफ कॅनडा’ येथून स्पेस सायन्स (अवकाश विज्ञान) मध्ये बॅचलर ऑफ सायन्स (B.Sc) पदवी प्राप्त केली.
व्युत्पन्न पदवी : त्यानंतर त्यांनी फिजिक्स (भौतिकशास्त्र) मध्ये मास्टर ऑफ सायन्स (M.Sc) पूर्ण केले आहे.
विशेष प्रमाणपत्र : जेरेमी यांच्याकडे ‘एअरलाईन ट्रान्स्पोर्ट पायलट लायसेन्स’ (ATPL) हे फ्लाईट सर्टिफिकेशनदेखील आहे.
