नैरोबी : ‘कोव्हिड 19’ महामारीला कारणीभूत झालेला’ सार्स कोव्ह-2’ या नव्या कोरोना विषाणूमुळे आता जगभरातील लोकांचे सर्वच विषाणू प्रकारांकडे लक्ष वेधलेले आहे. विषाणूंमध्ये बरीच वैविध्यता असते व त्यामुळे अनेक प्रकारचे आजारही जडत असतात. आता आफ्रिकन देश युगांडात 300 हून अधिक लोकांना ‘डिंगा डिंगा’ विषाणूची लागण झाली आहे. यामध्ये बहुतांश महिला व मुली आहेत. युगांडातील बुंदीबाग्यो जिल्ह्यात या गूढ आजाराचा सर्वात मोठा परिणाम दिसून आला आहे. जेव्हा रुग्णाला या विषाणूची लागण होते तेव्हा त्याच्या शरीरात तीव्र थरकाप सुरू होतो. हा थरकाप इतका तीव्र असतो की रुग्ण नाचत असल्यासारखे दिसतो. संसर्ग गंभीर असल्यास, रुग्णाला अर्धांगवायू देखील होऊ शकतो.
बुंदीबाग्यो जिल्हा आरोग्य अधिकारी कियिता क्रिस्टोफर यांच्या मते, हा विषाणू पहिल्यांदा 2023 मध्ये आढळला होता. तेव्हापासून युगांडा सरकार याची पडताळणी करत आहे. युगांडाच्या आरोग्य विभागाने अद्याप डिंगा डिंगा विषाणूमुळे झालेल्या मृत्यूंबाबत कोणतीही माहिती दिलेली नाही. विभागाने लोकांना वेळेवर औषधे घेण्याचा सल्ला दिला आहे. ज्या लोकांना संसर्ग झाला आहे त्यांना बुंदीबाग्यो येथील सरकारी रुग्णालयात दाखल करण्यात आले आहे. अहवालानुसार, या आजारापासून बचाव करण्यासाठी आतापर्यंत कोणतीही लस उपलब्ध नाही. आरोग्य अधिकारी कियिता यांच्या म्हणण्यानुसार, संक्रमित लोकांवर अँटीबायोटिक्स देऊन उपचार केले जात आहेत. यातून सावरण्यासाठी एक आठवडा लागणार आहे. कियिता यांनी हर्बल औषधे विषाणूवर उपचार करण्यासाठी कुचकामी असल्याचे वर्णन केले आहे. तसेच लोकांना चाचणी आणि उपचारांसाठी रुग्णालयात येण्यास सांगितले आहे. कियिता म्हणाल्या, हा आजार टाळण्यासाठी आरोग्य विभागाने लोकांना स्वच्छ राहण्याचा सल्ला दिला आहे. तसेच त्यांना कोणत्याही संक्रमित व्यक्तीच्या संपर्कात येण्यास मनाई करण्यात आली आहे. डॉ. कियिता म्हणाले की, बुंदीबुग्यो व्यतिरिक्त, इतर कोणत्याही जिल्ह्यात विषाणूची प्रकरणे आढळली नाहीत. यासोबतच अनेक संशयितांचे नमुने आरोग्य मंत्रालयाच्या टीमकडे पाठवण्यात आले आहेत. हे नमुने तपासणे बाकी आहे. या आजाराची तुलना 1518 मध्ये फ्रान्समध्ये पसरलेल्या ‘डान्सिंग प्लेग’शी केली जात आहे. लोकांना या आजाराची लागण होऊन बरेच दिवस थरथर कापायचे. सततच्या थरथर कापल्याने येणार्या थकव्यामुळे अनेक वेळा लोकांचा मृत्यूही झाला. युगांडामध्ये पसरलेल्या या आजाराला अद्याप शास्त्रीय नाव दिलेले नाही. वृत्तसंस्था मॉनिटरने दिलेल्या माहितीनुसार, तेथील लोक या विषाणूला सामान्य भाषेत ‘डिंगा-डिंगा’ म्हणतात. ज्याचा अर्थ ‘नृत्यासारखे जोरदार थरथरणे’ असा होतो. व्हायरसपासून बरे झालेल्या 18 वर्षांच्या पेशन्स कटुसिमेने न्यूज एजन्सी मॉनिटरला सांगितले की अर्धांगवायू असूनही त्याचे शरीर अनियंत्रितपणे थरथरत होते. त्याला प्रथम अशक्तपणा जाणवला आणि नंतर तो अर्धांगवायू झाला. त्याने सांगितले की, जेव्हा मी चालण्याचा प्रयत्न करतो तेव्हा माझे शरीर अनियंत्रितपणे थरथर कापू लागले. मला अशक्त आणि अर्धांगवायू झाल्यासारखे वाटले.
