बीजिंग : पश्चिम बंगाल आणि बांगला देशच्या सीमावर्ती भागात धुमाकूळ घालणार्या आणि 75 टक्के मृत्यूदर असलेल्या अत्यंत घातक ‘निपाह’ व्हायरसवर आता एक आशेचा किरण दिसला आहे. ज्या विषाणूवर आजवर कोणतीही लस उपलब्ध नव्हती, त्याला रोखण्यासाठी चीनचे एक औषध प्रभावी ठरू शकते, असा दावा एका नवीन संशोधनात करण्यात आला आहे. शास्त्रज्ञांनी प्रथमच ‘तत116’ नावाच्या औषधाची ओळख पटवली आहे, जे निपाह सारख्या जीवघेण्या विषाणूला हरवण्याची क्षमता ठेवते. प्रयोगशाळेतील चाचण्यांमध्ये या औषधाने विषाणूचे जीवनचक्र रोखण्यात यश मिळवले आहे. विशेष म्हणजे हे औषध रुग्णाला गोळीच्या स्वरूपात दिले जाऊ शकते.
हे औषध मूळतः ‘कोव्हिड-19’ च्या उपचारांसाठी विकसित करण्यात आले होते आणि चीन व उझबेकिस्तानमध्ये त्याचा वापर आधीच सुरू आहे. शास्त्रज्ञांच्या मते, हे औषध विषाणूच्या त्या एन्झाईमवर हल्ला करते जो शरीरात त्याची संख्या वाढवण्यास मदत करतो. विषाणूची वाढ थांबल्यामुळे संसर्ग आपोआप कमकुवत होतो. ‘इमर्जिंग मायक्रोब्स अँड इन्फेक्शन्स’ या जर्नलमध्ये प्रसिद्ध झालेल्या अहवालानुसार, या औषधाचे परिणाम समाधानकारक आहेत.
1. दोन्ही व्हेरिएंटवर प्रभावी : हे औषध निपाहच्या मलेशियन आणि बांगला देशी अशा दोन्ही प्रकारच्या व्हेरिएंटवर समान रीतीने काम करते.
2. जीवनदान : हॅम्स्टर्सवर केलेल्या चाचणीत, औषध दिलेल्या प्राण्यांचा वाचण्याचा दर 66.7 टक्क्यांपर्यंत आढळला.
3. व्हायरल लोड कमी : उपचारानंतर फुफ्फुस, प्लीहा आणि मेंदू यांसारख्या मुख्य अवयवांमधील विषाणूचे प्रमाण लक्षणीयरीत्या कमी झाले. निपाह हा विषाणू वटवाघळांपासून मानवांमध्ये पसरतो आणि एका व्यक्तीकडून दुसर्या व्यक्तीकडे त्याचा वेगाने प्रसार होतो. या औषधाला कोरोनासाठी आधीच मान्यता मिळाली असल्याने, निपाहच्या रुग्णांसाठी त्याचा वापर करण्याची परवानगी मिळवणे सोपे होऊ शकते. डॉक्टरांच्या मते, हे औषध केवळ रुग्णांसाठीच नाही, तर रुग्णांची सेवा करणार्या आरोग्य कर्मचार्यांचेही संसर्गापासून रक्षण करण्यासाठी उपयुक्त ठरेल.
