न्यूयॉर्क : अमेरिकन कुटुंबांमध्ये गेल्या दीडशे वर्षांपासून लोकप्रिय असलेल्या ‘अमेरिकन कॉकर स्पॅनियल’ या श्वान जातीला तज्ज्ञांनी सर्वाधिक निष्ठावान आणि प्रेमळ साथीदारांपैकी एक असल्याचे म्हटले आहे. एकेकाळी शिकारीसाठी वापरला जाणारा हा कुत्रा आज कुटुंबातील सदस्यासारखा वावरणारा विश्वासू पाळीव प्राणी म्हणून ओळखला जातो.
पशुवैद्यकीय तज्ज्ञांच्या मते, अमेरिकन कॉकर स्पॅनियल आपल्या मालकाशी अतिशय घट्ट नाते निर्माण करतो. तो सतत आपल्या कुटुंबीयांच्या सहवासात राहणे पसंत करतो आणि त्यांच्या दैनंदिन आयुष्याचा अविभाज्य भाग बनतो. याच स्वभावामुळे ही जात जगभरातील श्वानप्रेमींमध्ये लोकप्रिय आहे. या जातीची मूळ उत्पत्ती स्पेनमधील कॉकर स्पॅनियलपासून झाली. पुढे इंग्लिश आणि अमेरिकन असे दोन स्वतंत्र प्रकार विकसित झाले. १९४६ मध्ये अमेरिकन केनेल क्लबने (एकेसी) अमेरिकन कॉकर स्पॅनियलला स्वतंत्र जातीचा दर्जा दिला. १९५० च्या दशकात डिस्नेच्या ‘लेडी अँड द ट्रॅम्प’ चित्रपटामुळे आणि अमेरिकेचे तत्कालीन उपराष्ट्रपती रिचर्ड निक्सन यांच्या 'चेकर्स’ नावाच्या कॉकर स्पॅनियलमुळे या जातीची लोकप्रियता अधिक वाढली.
तज्ज्ञांच्या मते, या जातीचे कुत्रे प्रेमळ, खेळकर, सामाजिक आणि मुलांबरोबर तसेच इतर पाळीव प्राण्यांबरोबर सहज मिसळणारे असतात. त्यांना अतिशय जास्त व्यायामाची गरज नसली तरी नियमित फिरणे, खेळ आणि कुटुंबाचा सहवास आवश्यक असतो. मात्र, प्रत्येक कुत्र्याचा स्वभाव वेगळा असू शकतो. त्यामुळे फक्त जातीच्या प्रतिमेवर अवलंबून न राहता त्याचे संगोपन, प्रशिक्षण आणि समाजीकरण यालाही तितकेच महत्त्व असल्याचे पशुवैद्यकीय तज्ज्ञांनी स्पष्ट केले आहे.
