बार्शी : पुढारी वृत्तसेवा महाराष्ट्राचे हरितक्रांतीचे जनक वसंतराव नाईक यांच्या जन्मदिनानिमित्त 1 जुलै हा दिवस संपूर्ण महाराष्ट्रामध्ये 'कृषिदिन' म्हणून साजरा केला जातो. यानिमित्त अखिल भारतीय सीताफळ महासंघ व लायन्स क्लब बार्शी टाऊन यांच्या संयुक्त विद्यमाने सीताफळ उत्पादन तंत्रज्ञान याविषयी प्रशिक्षण व प्रगतशील शेतकर्यांचा सन्मान सोहळा आयोजित केला आहे. हा कार्यक्रम शुक्रवार, 1 जुलै रोजी मधुबन फार्म अँड नर्सरी, बार्शी-परंडा बायपास चौक, बार्शी येथे आयोजित करण्यात आलेला आहे.
या कार्यक्रमामध्ये सीताफळ जातीची निवड कशी करावी, मशागतपूर्व झाडांची लागवड कशी करावी, झाडांची छाटणी कशी करावी तसेच बहार येण्यासाठी ट्रिटमेंट कशी करावी, बहार आल्यानंतर पीक संरक्षणासाठी विविध उपाययोजना कशा कराव्यात, एकात्मिक अन्नद्रव्य नियंत्रण कसे करावे, विक्री व्यवस्थापन, सीताफळ प्रक्रिया उद्योग यासारख्या विविध बाबींवर प्रात्यक्षिक व मार्गदर्शन शेतकरीबांधवांना मोफत देण्यात येणार आहे.
हे प्रशिक्षण संपूर्णपणे मोफत असून ज्या शेतकरीबांधवांना प्रशिक्षण कार्यक्रमामध्ये सहभाग घ्यावयाचा आहे त्यांना नावनोंदणी करणे अनिवार्य आहे. कार्यक्रमाचा जास्तीत जास्त शेतकरीबांधवांनी लाभ घ्यावा, असे आवाहन करण्यात आले. कृषी सन्मान सोहळा 2022-23 यासाठी बार्शी तालुक्यातील शेती व शेतीपूरक व्यवसाय चांगेल उत्पन्न झाले आहे त्यांनी आपले कार्य व माहिती जमा करावी, असे आवाहन अखिल भारतीय सीताफळ महासंघाचे प्रबंधक प्रवीण कसपटे व लायन्स क्लब बार्शी टाऊन यांनी केले आहे.
