चंद्रपूर जिल्ह्यातील चिमूर तालुक्यातील नेरी येथे गावात हेमांडपंथी पार्वतीमातेचे मंदिर आहे. या ठिकाणी नवरात्रौत्सव उत्साहात साजरा होतो. वर्षभरही भाविक या ठिकाणी दर्शनाला येतात. त्यामुळे या ठिकाणी सभागृहाची भाविकाची मागणी होती. आमदार निधीतून सभागृह मंजूर करण्यात आले. काही दिवसांपूर्वीच या ठिकाणी कॉलमकरिता खड्ड्यांचे खोदकाम करण्यात आले, परंतु पुरात्व विभागाने या ठिकाणी खोदकाम करण्यास मनाई केल्याने खोदलेले खड्डे आज (दि. ३०) जेसीबीद्वारे बुजविण्यात येणार होते. सकाळी अकराच्या सुमारास पार्वती माता मंदिराच्या समोरील भागात सभागृह पायव्याचे खोदकामात दोन मोठ्या मुर्ती प्रमाणे मोठे दगड दिसून आले. त्यांची पाहणी केली असता शिवलिंग असल्याचे आढळून आले. शिवलिंगासभोवती माती असल्याने ते स्पष्ट दिसत नव्हती. पाण्याने साफ केल्यानंतर ते शिवलिंग असल्याचे स्पष्ट झाले.
