पुढारी ऑनलाईन डेस्क : ख्यातनाम उद्योजक, देशवासीयांच्या गळ्यातील ताईत बनलेले उद्योगपती आणि टाटा उद्योग समूहाचे अध्वर्यू रतन टाटा यांचे बुधवारी रात्री उशिरा दीर्घ आजाराने निधन झाले. त्यांच्या जाण्याने उद्योगजगतातील लखलखता ध्रुवतारा निखळला आहे. त्यांच्या निधनामुळे क्रीडा जगतावरही शोककळा पसरली असून, भारतीय क्रिकेट संघाचा कर्णधार रोहित शर्मासह अनेक दिग्गज क्रीडापटूंनी त्यांना श्रद्धांजली वाहिली आहे. (Ratan Tata Passed Away)
सोन्याचे हृदय असलेला माणूस. सर, इतरांची खऱ्या अर्थाने काळजी घेणारे आणि इतरांच्या भल्यासाठी आपले जीवन व्यतीत करणारी व्यक्ती म्हणून तुमची आठवण कायम राहील, असे भारतीय क्रिकेट संघाचा कर्णधार रोहित शर्मा याने आपल्या पाेस्टमध्ये म्हटलं आहे.
नीरज चोप्रा- श्री रतन टाटा जी यांच्या निधनाबद्दल ऐकून मला खूप दुःख झाले. तो एक द्रष्टा होता आणि मी त्याच्याशी केलेले संभाषण कधीच विसरणार नाही. त्यांनी संपूर्ण देशाला प्रेरणा दिली. त्याच्या प्रियजनांना शक्ती मिळावी अशी मी प्रार्थना करतो. ओम शांती.
भारतीय क्रिकेट नियामक मंडळ (बीसीसीआय) म्हटलं आहे की, रतन टाटा यांचे विविध क्षेत्रांतील अमूल्य योगदानाने भारताची प्रगती आणि यशोगाथा घडवण्यात महत्त्वाची भूमिका बजावली आहे. उत्कटता, सहानुभूती, दूरदर्शी नेतृत्व, नावीन्य आणि उत्कृष्टता या तत्त्वांवर आधारित त्यांचा असाधारण वारसा पुढील अनेक वर्षे भावी पिढ्यांना प्रेरणा आणि मार्गदर्शन करत राहील.
मोहम्मद शमी याने आपल्या पोस्टमध्ये म्हटलं आहे की, रतन टाटा सर, तुम्ही तुमचे संपूर्ण आयुष्य देशाच्या प्रगतीसाठी समर्पित केले. तुमची नम्रता नेहमीच आमच्यासाठी प्रेरणादायी असेल.
सूर्यकुमार यादवने म्हटलं आहे की, एका युगाचा अंत. दयाळूपणाचे प्रतीक, सर्वात प्रेरणादायक, एक आश्चर्यकारक व्यक्ती. सर, तुम्ही अनेकांच्या हृदयाला स्पर्श केला आहे. तुमचे जीवन देशासाठी वरदान ठरले आहे. तुमच्या अविरत आणि बिनशर्त सेवेबद्दल धन्यवाद.
भारताचे खरे रतन, श्री रतन टाटा जी गमावले आहेत. त्यांचे जीवन आपल्या सर्वांसाठी प्रेरणास्थान राहील आणि ते सदैव आपल्या हृदयात राहतील, असे वीरेंद्र सेहवागने आपल्या पोस्टमध्ये म्हटलं आहे.
सुरेश रैना- भारताने खरा आदर्श गमावला आहे. रतन टाटा सरांचे दूरदर्शी नेतृत्व, करुणा आणि परोपकाराची अटल बांधिलकी यांनी आपल्या देशावर आणि जगावर अमिट छाप सोडली आहे. त्यांचा वारसा आपल्या सर्वांना प्रेरणा देत राहील.
