मुंबई : इंडियन प्रीमियर लीग (IPL 2026) च्या चालू हंगामात आपल्या धडाकेबाज फलंदाजीने क्रिकेट जगताचे लक्ष वेधून घेणारा राजस्थान रॉयल्सचा १५ वर्षीय युवा फलंदाज वैभव सूर्यवंशी सध्या कमालीचा चर्चेत आहे. अवघ्या १५ व्या वर्षी त्याने दाखवलेले मैदानातील कौशल्य आणि त्याची उत्कृष्ट फॉर्म पाहून चाहत्यांकडून त्याचे जोरदार कौतुक केले जात आहे. वैभवने लवकरात लवकर भारतीय संघात स्थान मिळवावे, अशी इच्छा क्रिकेटप्रेमी व्यक्त करत असून, सोशल मीडिया आणि क्रीडा जगतात त्याची थेट क्रिकेटचे दैवत सचिन तेंडुलकरशी तुलना केली जात आहे. मात्र, भारताचा माजी यष्टीरक्षक-फलंदाज आणि रॉयल चॅलेंजर्स बेंगळुरू (RCB) संघाचा फलंदाजी प्रशिक्षक दिनेश कार्तिक याने या तुलनेवर स्पष्ट आक्षेप घेत चाहत्यांना एक महत्त्वपूर्ण इशारा दिला आहे.
'क्वेस्ट टॉक' या पॉडकास्टच्या भागात बोलताना दिनेश कार्तिकने वैभव सूर्यवंशीच्या कामगिरीचे कौतुक केले, परंतु त्याची सचिन तेंडुलकरसोबत होणारी तुलना घाईघाईची असल्याचे मत मांडले. कार्तिक म्हणाला, ‘वैभव सध्या मैदानावर जे काही करत आहे, ते अत्यंत कौतुकास्पद आणि विशेष आहे. परंतु, लोकांनी त्याला आताच 'पुढचा सचिन' म्हणून संबोधू नये, असे मला वाटते. तो अवघ्या १५ वर्षांचा असून क्रिकेटमध्ये आपले स्थान निर्माण करत आहे. महान फलंदाज सचिन तेंडुलकर यांनी आपल्या कारकिर्दीत जे अफाट यश मिळवले, ते अतुलनीय आहे.’
कार्तिकने पुढे स्पष्ट केले की, आगामी काळात वैभवसमोर येणारी आव्हाने पूर्णपणे वेगळी असतील. सचिन तेंडुलकर यांना मैदानावर जेवढ्या आव्हानांचा सामना करावा लागला, तेवढीच आव्हाने मैदानाबाहेरही होती. मात्र, वैभवसाठी मैदानाबाहेरील आव्हाने अधिक तीव्र असण्याची शक्यता आहे. वैभवकडे क्रिकेटचे उत्कृष्ट कौशल्य आहे, ज्यामुळे तो खेळातील तांत्रिक गोष्टी उत्तम प्रकारे हाताळू शकतो, परंतु मैदानाबाहेर निर्माण होणाऱ्या परिस्थितीचा सामना करणे त्याच्यासाठी अधिक महत्त्वाचे ठरेल.
चालू आयपीएल हंगामात वैभव सूर्यवंशीने आपल्या आक्रमक फलंदाजीने गोलंदाजांची अक्षरशः दैना उडवली आहे. त्याने आतापर्यंत खेळलेल्या १३ सामन्यांमधील १३ डावांमध्ये २३७ च्या थक्क करणाऱ्या स्ट्राईक रेटने तब्बल ५७९ धावा फटकावल्या आहेत. या उत्कृष्ट कामगिरीच्या जोरावर त्याने सर्वाधिक धावा करणाऱ्या फलंदाजांच्या 'ऑरेंज कॅप'च्या शर्यतीत आघाडीच्या पाच फलंदाजांमध्ये स्थान मिळवले आहे. राजस्थान रॉयल्सला प्लेऑफमध्ये पोहोचवण्यासाठी तो सध्या एकाकी झुंज देत आहे. राजस्थानचा पुढील सामना २४ मे रोजी मुंबई इंडियन्सविरुद्ध होणार असून, या सामन्यात विजय मिळवून प्लेऑफमधील आपले स्थान निश्चित करण्याचा राजस्थानचा प्रयत्न असेल.
याच संभाषणात दिनेश कार्तिकने २००८ मधील सुरुवातीच्या हंगामापासून ते आतापर्यंत आयपीएलमध्ये झालेल्या आमूलाग्र बदलांवरही प्रकाश टाकला. आयपीएल ही जगातील सर्वात वेगाने वाढणारी क्रिकेट लीग असल्याचे सांगत कार्तिक म्हणाला की, या लीगने खेळाडूंना एक दर्जेदार जीवनशैली आणि आर्थिक स्थैर्य मिळवून दिले आहे. आजच्या काळात क्रिकेट खेळू इच्छिणाऱ्या कोणत्याही तरुण मुला किंवा मुलीसाठी आयपीएल हा एक उत्तम आणि सुरक्षित करिअरचा पर्याय बनला आहे, असेही त्याने नमूद केले.
