न्यूयॉर्क; वृत्तसंस्था : कझाकिस्तानच्या एलेना रायबाकिनाने महिला एकेरीच्या अंतिम सामन्यात अरिना सबालेंकाचे यूएस ओपनवरील दोन वर्षांचे वर्चस्व संपुष्टात आणले. रायबाकिनाने ६-४, ५-७, ६-२ अशा फरकाने विजय मिळवत फ्लशिंग मेडोजवरील आपले पहिले विजेतेपद पटकावले. तसेच जागतिक क्रमवारीत पुन्हा अव्वल स्थानही काबीज केले.
आर्थर ॲश स्टेडियमवर झालेल्या या सामन्यात दुसऱ्या मानांकित रायबाकिनाने अग्रमानांकित आणि दोन वेळच्या गतविजेत्या सबालेंकाला सलग तिसरे विजेतेपद पटकावण्यापासून रोखले. सोमवारी अद्ययावत होणाऱ्या महिला टेनिस संघटनेच्या (डब्ल्यूटीए) क्रमवारीत रायबाकिना आता अव्वल स्थानावर पोहोचेल.
सामन्याच्या सुरुवातीला दोन्ही खेळाडूंनी बेसलाईनवरून जोरदार फटकेबाजी केली; मात्र रायबाकिनाने खेळात अधिक सातत्य राखले. तिने सुरुवातीलाच सबालेंकाची सर्व्हिस मोडीत काढत ३-२ अशी आघाडी घेतली आणि स्वतःची सर्व्हिस राखत ती कायम ठेवली. ५-४ अशा स्थितीत रायबाकिनाला पहिला सेट पॉईंट मिळाला, मात्र तो साधण्यात ती अपयशी ठरली. त्यानंतरच्या संधीचा फायदा घेत तिने कोणतीही चूक न करता पहिला सेट ६-४ असा जिंकला. दुसऱ्या सेटमध्ये सबालेंकाने खेळ उंचावत सामन्यातील रंगत वाढवली. ५-५ अशा बरोबरीत असताना सबालेंकाने तीन ब्रेक पॉईंट्सचा यशस्वी बचाव केला आणि ६-५ अशी आघाडी मिळवली. त्यानंतर तिने मिळालेल्या पहिल्या ब्रेक पॉईंटचे रूपांतर सेट पॉईंटमध्ये करत सामना १-१ असा बरोबरीत आणला.
निर्णायक तिसऱ्या सेटमध्ये रायबाकिनाने सबालेंकाच्या चुकांचा फायदा घेत तिने आपली आघाडी ४-२ अशी वाढवली व नंतर ५-२ अशा स्थितीत विजेतेपदासाठी सर्व्हिस करताना रायबाकिनाने दुहेरी चुकीमुळे (डबल फॉल्ट) पहिला चॅम्पियनशिप पॉईंट गमावला. मात्र, लागलीच सावरत तिने पुढच्याच पॉईंटवर खणखणीत ‘एस’ लगावत जेतेपदावर नाव कोरले.
२०१३ नंतर प्रथमच मानांकित टेनिसपटूत लढत
सेरेना विल्यम्स आणि व्हिक्टोरिया अझारेंका यांच्यात २०१३ मध्ये झालेल्या अंतिम लढतीनंतर प्रथमच यूएस ओपन महिला एकेरीची अंतिम फेरी अव्वल दोन मानांकित खेळाडूंमध्ये खेळवली गेल्याने या लढतीला ऐतिहासिक महत्त्वही लाभले होते. या विजयामुळे न्यूयॉर्कमधील रायबाकिनाची यशस्वी मोहीम पूर्ण झाली असून, तिच्या पहिल्या यूएस ओपन विजेतेपदासह महिला टेनिस जगतातील तिचे सर्वोच्च स्थानही निश्चित झाले आहे.
