Mohammad Rizwan betting case PCB : ऑनलाइन बेटिंग आणि जुगाराशी संबंधित प्रकरणांमध्ये कथित सहभागाबाबत 'नॅशनल सायबर क्राईम इन्व्हेस्टिगेशन एजन्सी' (NCCIA) द्वारे सुरू असलेल्या चौकशीच्या संदर्भात, पाकिस्तान क्रिकेट बोर्डाने (PCB) माजी कर्णधार मोहम्मद रिझवानला प्रसारमाध्यमांशी बोलण्याची परवानगी नाकारली आहे.
रिझवानने गेल्या आठवड्यात प्रसारमाध्यमांशी बोलण्याची परवानगी मिळवण्यासाठी पीसीबीकडे दोनदा विनंती केली होती, परंतु दोन्ही वेळा त्याची विनंती फेटाळण्यात आली.
इंग्लंड दौऱ्यादरम्यान वरिष्ठ सहकारी इमाम-उल-हक आणि सलमान अली आगा यांच्यासह मायदेशी परत बोलावण्यात आलेल्या रिझवानची चर्चा तेव्हापासून सुरू झाली. NCCIA ने त्याला ऑनलाइन बेटिंग, जुगार आणि त्याच्या आर्थिक व्यवहारांशी संबंधित एका प्रकरणात चौकशीसाठी बोलावले होते. लॉर्ड्सवरील दुसऱ्या कसोटी सामन्यादरम्यान रिझवान आणि इमाम यांचे फोन जप्त करण्यात आले होते. सध्या NCCIA द्वारे त्यांची फॉरेन्सिक तपासणी केली जात आहे.
पाकिस्तान संघाने अलीकडेच ऑगस्ट आणि सप्टेंबर महिन्यात तीन सामन्यांची कसोटी मालिका खेळण्यासाठी इंग्लंडचा दौरा केला होता. या मालिकेत पाकिस्तानला दारुण पराभवाला सामोरे जावे लागले आणि इंग्लंडने मालिका ३-० अशी जिंकली. लीड्समधील हेडिंग्ले येथे खेळल्या गेलेल्या सामन्यात पाकिस्तानचा एका डावाने आणि मोठ्या फरकाने पराभव झाला. त्या वेळी परिस्थिती आधीच चिंताजनक होती, परंतु पाकिस्तानचा दुसऱ्या कसोटी सामन्यात १९४ धावांनी पराभव होऊन मालिका गमावल्यानंतर पीसीबीने तातडीने पावले उचलली.
पीसीबी प्रमुख मोहसिन नकवी यांनी कठोर भूमिका घेतली. त्यांनी निवड समितीकडे मोहम्मद रिझवान आणि इमाम-उल-हक यांच्या समावेशाबाबत स्पष्टीकरण मागितले. २४ तासांच्या आत उत्तर देण्याची नोटीस बजावली. याच दरम्यान, सात खेळाडूंना मायदेशी परत बोलावण्याचे आदेश देण्यात आले होते. कसोटी संघाचे मुख्य प्रशिक्षक आणि गोलंदाजी प्रशिक्षक यांनाही त्यांच्या पदावरून हटवण्यात आले. याव्यतिरिक्त, सर्व खेळाडू मायदेशी परतल्यानंतर इमाम-उल-हक आणि मोहम्मद रिझवान यांच्याविरुद्ध चौकशी सुरू करण्यात आली. त्यांचे मोबाईल फोन जप्त करण्यात आले. या दोघांनी ड्रेसिंग रूममधील माहिती बाहेरील व्यक्तींना पुरवल्याचा आरोप करण्यात आला. बेटिंगमध्ये सहभाग असण्याची शक्यता असल्याने, अधिकाऱ्यांनी त्यांच्या बँक व्यवहारांची माहिती गोळा करण्यासही सुरुवात केली. सध्या या प्रकरणाची सखोल चौकशी सुरु आहे.
