FIFA World Cup 2026
डॅलस (अमेरिका): अर्जेन्टिनाचा महान फुटबॉलपटू लिओनेल मेस्सीने फुटबॉल जगतात पुन्हा एकदा एका नव्या सुवर्ण अध्यायाची नोंद केली आहे. फिफा विश्वचषक २०२६ (FIFA World Cup 2026) मधील ऑस्ट्रियाविरुद्धच्या सामन्यात गोल करत मेस्सीने पुरुषांच्या फिफा विश्वचषक इतिहासात सर्वाधिक गोल करण्याचा ऐतिहासिक विक्रम आपल्या नावावर केला आहे. या १७ व्या विश्वचषक गोल्सह त्याने जर्मनीचा दिग्गज खेळाडू मिरोस्लाव क्लोसचा तब्बल १२ वर्षांपूर्वीचा विक्रम मोडीत काढला आहे.
पेनल्टी चुकली, पण ३८ व्या मिनिटाला रचला इतिहास!
सोमवार, २२ जून रोजी झालेल्या ग्रुप 'जे' (Group J) मधील ऑस्ट्रियाविरुद्धच्या सामन्यात मेस्सीने हा पराक्रम केला. सामन्याच्या सुरुवातीला म्हणजेच ९ व्या मिनिटाला अर्जेन्टिनाला पेनल्टी मिळाली होती, मात्र मेस्सीचा हा शॉट गोलपोस्टच्या बाहेर गेल्याने मैदानात काही काळ शांतता पसरली होती. परंतु, ही निराशा मेस्सीने फार काळ टिकू दिली नाही.
सामन्याच्या ३८ व्या मिनिटाला सहकाऱ्यांकडून मिळालेल्या अचूक पासेसचा फायदा उठवत मेस्सीने डी-बॉक्सच्या जवळून एक अप्रतिम आणि वेगवान शॉट मारत चेंडू थेट गोलपोस्टच्या डाव्या कोपऱ्यात धाडला.
मिरोस्लाव क्लोसला टाकले मागे
या गोलसह मेस्सीच्या विश्वचषक कारकिर्दीतील एकूण गोल्सची संख्या आता १७ झाली आहे. यापूर्वी हा विक्रम जर्मनीच्या मिरोस्लाव क्लोसच्या नावावर होता, ज्याने २०१४ च्या विश्वचषकात आपला १६ वा गोल करून इतिहास रचला होता. तब्बल १२ वर्षांनंतर मेस्सीने त्याला मागे टाकत विश्वचषकाचा मुकुट परिधान केला आहे.
विश्वचषक इतिहासातील अव्वल गोल स्कोअरर (पुरुष):
लिओनेल मेस्सी (अर्जेन्टिना): १७ गोल
मिरोस्लाव क्लोस (जर्मनी): १६ गोल
रोनाल्डो (ब्राझील): १५ गोल
गर्ड म्युलर (पश्चिम जर्मनी): १४ गोल
३८ वर्षे ३६३ दिवस वय असलेल्या मेस्सीने आपल्या ३९ व्या वाढदिवसाच्या अवघ्या दोन दिवस आधी हा पराक्रम केला. याशिवाय तो २००६, २०१०, २०१४, २०१८, २०२२ आणि २०२६ अशा तब्बल ६ वेगवेगळ्या विश्वचषक स्पर्धांमध्ये खेळणारा जगातील पहिला पुरुष फुटबॉलपटू ठरला आहे. यंदाच्या विश्वचषकात मेस्सी उत्कृष्ट फॉर्ममध्ये असून त्याने अवघ्या दोन सामन्यांत ४ गोल केले आहेत, ज्यात अल्जेरियाविरुद्धच्या पहिल्या सामन्यातील धडाकेबाज हॅट्ट्रिकचा समावेश आहे. विद्यमान विश्वविजेत्या अर्जेन्टिनाचा कर्णधार लिओनेल मेस्सीने मिळवलेले हे यश त्याच्या आजवरच्या फुटबॉल कारकिर्दीतील सर्वात महान आणि अविस्मरणीय कामगिरी पैकी एक ठरले आहे.
