मँचेस्टर; वृत्तसंस्था : कर्णधार बेन स्टोक्सच्या दोन वर्षांतील पहिल्या दमदार शतकाच्या जोरावर इंग्लंडने चौथ्या कसोटी सामन्यात भारतासमोर पहिल्या डावात धावांचा डोंगर उभा केला. चौथ्या दिवशी इंग्लंडचा पहिला डाव 669 धावांवर संपुष्टात आला आणि त्यांनी भारतावर 311 धावांची भक्कम आघाडी मिळवली. या महाकाय धावसंख्येला प्रत्युत्तर देताना भारताची दुसर्या डावात 2 बाद 86 अशी स्थिती होती. शुभमन गिल 52 तर केएल राहुल 32 धावांवर खेळत होते.
शनिवारी खेळाला सुरुवात झाली तेव्हा इंग्लंड 544/7 अशा स्थितीत होता आणि स्टोक्स 77 धावांवर खेळत होता. सुरुवातीला थोडा नर्व्हस दिसणार्या स्टोक्सने लवकरच आपला जम बसवला आणि दोन वर्षांचा शतकाचा दुष्काळ संपवला. शतक पूर्ण झाल्यावर त्याने आकाशाकडे पाहत आपल्या दिवंगत वडिलांना आदरांजली वाहिली. या खेळीदरम्यान स्टोक्सने अनेक विक्रम आपल्या नावे केले.
एकाच कसोटी सामन्यात शतक आणि पाच बळी घेणारा तो इंग्लंडचा चौथा खेळाडू ठरला. याशिवाय, कर्णधार म्हणून अशी कामगिरी करणारा तो पहिलाच इंग्लिश खेळाडू आहे. या खेळीदरम्यान त्याने कसोटी क्रिकेटमध्ये 7,000 धावांचा टप्पाही ओलांडला. स्टोक्सने या डावात 141 धावांची शानदार खेळी केली. त्याला ब्रायडन कार्सने 47 धावांची उपयुक्त साथ दिली. अखेर इंग्लंडचा संपूर्ण संघ 669 धावांवर बाद झाला.
प्रत्युत्तरात, 311 धावांच्या प्रचंड दबावाखाली खेळणार्या भारताची सुरुवात अगदीच खराब झाला. ख्रिस वोक्सने टाकलेल्या पहिल्याच षटकात भारताने सलग दोन चेंडूंवर दोन गडी गमावले. यशस्वी जैस्वाल आणि साई सुदर्शन खाते न उघडताच तंबूत परतले. या सुरुवातीच्या पडझडीमुळे भारतीय संघ सामन्यात पूर्णपणे बॅकफूटवर ढकलला गेला तर इंग्लंडने सामन्यावर आपली पकड घट्ट केली.
2 भारताने डावातील पहिल्याच षटकात दोन बळी गमावण्याची या शतकातील ही केवळ दुसरी वेळ आहे. यापूर्वी 2014 मध्ये न्यूझीलंड विरुद्ध ऑकलंड कसोटीत भारतावर अशी नामुष्की आली होती.
19 गिल व राहुल यांनी दुसर्या डावात अर्धशतकी भागीदारी साकारली, त्यावेळी भारतासाठी 50 व त्याहून अधिक धावांची ही या मालिकेतील 19 वी भागीदारी ठरली.
157.1 बॅझबॉल पर्वाला सुरुवात झाल्यानंतर इंग्लंडने आपल्या पहिला डावात 157.1 षटके फलंदाजी केली, हा देखील एक विक्रम आहे. यापूर्वी 2024 मध्ये पाकिस्तानविरुद्ध मुलतान कसोटीत त्यांनी 150 षटके फलंदाजी केली होती.
