फुटबॉल विश्वचषकाच्या इतिहासातील एका अत्यंत नाट्यमय आणि ऐतिहासिक पुनरागमनाचा साक्षीदार क्रीडा जगताला मिळाला आहे. सामन्याच्या ८६ व्या मिनिटांपर्यंत २-० अशा मजबूत आघाडीसह 'अंतिम १६' फेरीच्या उंबरठ्यावर असलेल्या सेनेगलला बेल्जियमने धक्का दिला. रोमेलू लुकाकू आणि कर्णधार युरी टायलेमन्स यांनी जिगरबाज खेळी करून बेल्जियमला शेवटच्या क्षणी निर्धारित वेळेत २-२ अशी बरोबरी आणले. त्यानंतर अतिरिक्त वेळेत (१२५ व्या मिनिटाला) टायलेमन्सने पेनाल्टीचे गोलमध्ये रूपांतर करत बेल्जियमला ३-२ असा थरारक विजय मिळवून दिला. या थरारक विजयासह बेल्जियमने पुढील फेरीत प्रवेश केला असून, आता त्यांचा सामना यजमान अमेरिकेशी रंगणार आहे.
सेनेगलने सामन्याच्या सुरुवातीपासून आक्रमक खेळ करण्यास सुरुवात केली होती. हबीब दियारा आणि इस्माईल सार यांनी अनुक्रमे २४ आणि ५१ व्या मिनिटाला अप्रतिम गोल डागले. ज्याच्या जोरावर सेनेगलने २-० अशी मजबूत आघाडी घेतली. पण सामन्याच्या ८६ व्या मिनिटाला रोमेलू लुकाकूने गोल करत बेल्जियमच्या आशा जिवंत केल्या. यानंतर अवघ्या तीन मिनिटांत मैदानावर काही वेळापूर्वीच एकमेकांशी वाद घालताना दिसलेल्या लिआंड्रो ट्रॉसार्ड आणि युरी टायलेमन्स या जोडीने कमाल केली. ट्रॉसार्डच्या अचूक क्रॉसवर कर्णधार टायलेमन्सने ८९ व्या मिनिटाला उत्कृष्ट हेडर मारून सामन्यात २-२ अशी बरोबरी साधली आणि सामना अतिरिक्त वेळेत ढकलला.
अतिरिक्त वेळेत खरा थरार आणि वाद निर्माण झाला. लॅमिन कमाराने टायलेमन्सला पाडल्यामुळे व्हिडिओ असिस्टंट रेफ्री (VAR) च्या तपासणीनंतर बेल्जियमला पेनाल्टी बहाल केली. सामन्याच्या १२५ व्या मिनिटाला कर्णधार टायलेमन्सने या पेनाल्टीचे गोलमध्ये रूपांतर करत बेल्जियमला ऐतिहासिक विजय मिळवून दिला. हा सामना विश्वचषकाच्या इतिहासातील सर्वात मोठ्या आणि अविश्वसनीय पुनरागमनांपैकी एक ठरला.
पहिल्या ७० मिनिटांत सेनेगल बेल्जियमपेक्षा सरस होता, पण लुकाकू मैदानात आला आणि त्याने सामन्याचा नूरच बदलून टाकला. त्यानंतर ट्रॉसार्डच्या क्रॉसवर सेनेगलचा गोलकीपर मोरी दियाव चुकला आणि टायलेमन्सने रिकाम्या जाळीत चेंडू ढकलून इतिहास रचला. विश्वचषकाच्या इतिहासात निर्धारित वेळेत दोन किंवा त्याहून अधिक गोल करून पिछाडीवर असूनही पराभव टाळण्याची ही सर्वात शेवटची वेळ ठरली. सामन्याच्या १२४ मिनिटे आणि ४४ सेकंदाला टायलेमन्सने मारलेला पेनाल्टी गोल हा विश्वचषक इतिहासातील सर्वात उशिरा झालेला गोल ठरला.
बेल्जियमसाठी असे पुनरागमन नवीन नाही. २०१८ च्या विश्वचषकात जपानविरुद्ध २-० ने पिछाडीवर असताना त्यांनी अशीच कामगिरी केली होती. थिबॉत कोर्टुआ, केविन डी ब्रुइन, म्युनियर आणि लुकाकू हे खेळाडू आठ वर्षांपूर्वीच्या त्या ऐतिहासिक सामन्याचाही भाग होते. विश्वचषकात दोन गोलांनी पिछाडीवर असताना सामना जिंकण्याचा पराक्रम यापूर्वी केवळ जर्मनीने (१९५४ मध्ये हंगेरी आणि १९७० मध्ये इंग्लंडविरुद्ध) केला आहे.
