मँचेस्टर; वृत्तसंस्था : जेकब बेथेलच्या ४६ चेंडूंत नाबाद ७६ धावांच्या धडाकेबाज खेळीच्या जोरावर इंग्लंडने येथील दुसऱ्या टी-२० सामन्यात भारताविरुद्ध ४ गडी राखून एकतर्फी विजय मिळविला आणि ५ सामन्यांच्या मालिकेत १-० अशी आघाडी घेतली. भारताने प्रारंभी ७ बाद १९० धावा झळकावल्या, तर प्रत्युत्तरात १९ षटकांत ६ गड्यांच्या बदल्यात इंग्लंडने विजयाचे लक्ष्य गाठले.
विजयासाठी १९१ धावांचे आव्हान असताना इंग्लंडला पहिल्याच षटकात अर्शदीपने २ झटके दिले. मात्र, जेकब बेथेलने झुंजार अर्धशतकी खेळी साकारत विजय मिळवून दिला. कर्णधार हॅरी ब्रुक व टॉम बँटॉन यांनी प्रत्येकी ३९ धावा जोडल्या.
प्रारंभी युवा पदार्पणवीर वैभव सूर्यवंशी अवघ्या १४ धावांवर बाद झाला असला तरी इशान किशन (४९) व अभिषेक शर्मा (४३) यांच्या फलंदाजीच्या बळावर भारताने ७ बाद १९० धावांपर्यंत मजल मारली. सूर्यवंशी आपल्या पदार्पणाच्या लढतीत अवघ्या १४ धावांवर बाद झाला असला तरी त्याने आर्चरला फाईन लेगकडे षटकार फटकावत आपल्या आगमनाची जोरदार वर्दी दिली. या सामन्याचे मुख्य वैशिष्ट्य म्हणजे अवघ्या १५ वर्षे ९९ दिवस वयाच्या वैभव सूर्यवंशीने आंतरराष्ट्रीय क्रिकेटमध्ये ऐतिहासिक पदार्पण केले. आयपीएल गाजवणाऱ्या वैभवने मैदानात उतरताच सचिन तेंडुलकरचा ३६ वर्षांपूर्वीचा विक्रम मोडीत काढला.
भारत : २० षटकांत ७/१९०. (इशान किशन ४९, अभिषेक शर्मा ४३). इंग्लंड : १९ षटकांत ६/१९१. (बेथेल नाबाद ७६).
