Raja Shivaji Anthem ‘Chhatrapati’ Out: इतिहास केवळ वाचायचा नसतो… तो अनुभवायचा असतो. आणि तोच अनुभव आता ‘राजा शिवाजी’ या बहुप्रतिक्षित चित्रपटाच्या पहिल्या गाण्याने प्रेक्षकांना दिला आहे. ‘छत्रपती’ हे अँथम रिलीज होताच सोशल मीडियावर आणि संगीतप्रेमींमध्ये प्रचंड उत्साह पाहायला मिळतोय. हे गाणं छत्रपती शिवाजी महाराजांच्या पराक्रमाची, स्वाभिमानाची आणि हिंदवी स्वराज्याच्या स्वप्नाची अनुभूती देतं.
या अँथमच्या मागे आहे संगीत क्षेत्रातील दिग्गज जोडी अजय-अतुल. त्यांनी या गाण्याला दिलेला भव्य आणि उर्जावान टच प्रेक्षकांच्या मनाला भिडत आहे. गायक अजय गोगावले यांच्या आवाजाने या गाण्याला एक वेगळी उंची मिळाली आहे. त्यांचा दमदार आवाज ऐकताना अंगावर अक्षरशः शहारे येतात.
या गाण्याची सर्वात मोठी ताकद म्हणजे त्याचा स्केल. तब्बल 80 गायकांनी मिळून तयार केलेला कोरस या अँथमला भव्यता देतो. प्रत्येक स्वरात अभिमान, प्रत्येक लयीत ऊर्जा आणि प्रत्येक ओळीत स्वराज्याचा जाज्वल्य इतिहास जाणवतो.
या गाण्याचं नृत्यदिग्दर्शन प्रसिद्ध कोरिओग्राफर रेमो डिसूझा यांनी केलं आहे. त्यामुळे प्रत्येक फ्रेम जिवंत वाटते. भव्य सेट्स आणि उंचावत जाणारा संगीताचा प्रवाह हे सगळं प्रेक्षकांना एका वेगळ्याच जगात घेऊन जातं.
‘छत्रपती’ हे गाणं केवळ एका राजाच्या पराक्रमाचं वर्णन करत नाही, तर ते स्वराज्याची प्रेरणा, रयतेची एकता आणि मराठी अस्मिता यांची जाणीव करून देतं. हे ऐकताना इतिहास पुन्हा जिवंत झाल्यासारखं वाटतं.
'राजा शिवाजी' हा चित्रपट अभिनेते आणि दिग्दर्शक रितेश देशमुख यांच्या दिग्दर्शनाखाली तयार होत आहे. या चित्रपटात संजय दत्त, अभिषेक बच्चन, विद्या बालन, महेश मांजरेकर, सचिन खेडेकर, बोमन इराणी, जिनिलिया देशमुख यांसारखी तगडी स्टारकास्ट पाहायला मिळणार आहे. हा भव्य चित्रपट 1 मे 2026 रोजी जगभरात प्रदर्शित होणार आहे.
