मुंबई : यंदाच्या दिवाळीत बॉलिवूडमध्ये मोठ्या बजेट रिलीज चित्रपटांची कमतरता जाणवणार असून, बॉक्स ऑफिसवर गर्दी खेचण्याची जबाबदारी आता मध्यम बजेटच्या चित्रपटांवर येऊन पडली आहे. गेल्या काही महिन्यांत 'वॉर 2' आणि 'कुली' यांसारख्या मोठ्या बजेटच्या चित्रपटांना अपेक्षित यश मिळालेले नाही, त्यामुळे इंडस्ट्रीसमोर आव्हान अधिकच वाढले आहे.
चित्रपट निर्माते आणि उद्योग विश्लेषकांच्या मते, दिवाळी आणि ख्रिसमससारख्या सणांमध्ये मोठ्या चित्रपटांच्या प्रदर्शनाची प्रथा आहे. हे चित्रपट संपूर्ण कुटुंबासाठी असतात आणि प्रेक्षक मोठ्या प्रमाणावर थिएटरमध्ये गर्दी करतात. मात्र, यंदा दिवाळीत एकही मोठा चित्रपट प्रदर्शित होत नसल्याने ही परंपरा खंडित झाली असल्याचे चित्र आहे.
दिवाळीच्या आठवड्यात फक्त अयुष्मान खुरानाचा हॉरर-कॉमेडी 'थामा' हा चित्रपट मोठ्या प्रमाणावर चर्चेत आहे. त्याशिवाय 'इक्कीस', 'सनी संस्कारी की तुलसी कुमारी', '१२० बहादूर', 'रोमिओ', 'जॉली एलएलबी ३' हे मध्यम बजेटचे चित्रपट उर्वरित वर्षात प्रमुख ठरणार आहेत. बॉक्स ऑफिसवरील आकडेवारीनुसार, 'कुली'ने आतापर्यंत 262.2 रुपये कोटी आणि 'वॉर २'ने 225.8 रुपये कोटी कमावले आहेत, परंतु हे चित्रपट 350 ते 450 कोटींच्या बजेटमध्ये बनवले गेले होते. त्यामुळे अपेक्षित नफा मिळालेला नाही.
आतापर्यंतचा इतिहास पाहता, दिवाळीच्या आठवड्यातील चित्रपट हे हिंदी चित्रपटसृष्टीच्या वार्षिक कमाईपैकी 10 ते % 15 उत्पन्न देतात. गेल्या वर्षी 'सिंघम अगेन' आणि 'भूल भुलैया 3' या दोन चित्रपटांनी मिळून 653 रुपये कोटींची कमाई केली होती, जी एकूण हिंदी बॉक्स ऑफिसच्या 14 टक्के इतकी होती.
यंदाच्या दिवाळीत प्रेक्षकांना मोठ्या स्टार्सचे, भव्य चित्रपट पाहायला मिळणार नाहीत. त्यामुळे 'थामा'सारख्या हॉरर-कॉमेडी आणि इतर मध्यम बजेटच्या चित्रपटांवरच बॉक्स ऑफिसचे भवितव्य अवलंबून राहणार आहे. इंडस्ट्रीला आता या चित्रपटांकडूनच दिवाळीच्या काळात काहीतरी चांगली कमाई होण्याची आशा आहे.
गेल्या वर्षीच्या दिवाळी चित्रपटांची योजना दोन वर्षांपूर्वीच झाली होती. मात्र, यंदा इंडस्ट्रीमध्ये योग्य नियोजनाचा अभाव दिसून आला आहे, असे ट्रेड अॅनालिस्ट गिरीश वानखेडे यांनी सांगितले. हिंदी आणि दक्षिण भारतीय भाषांतील मध्यम बजेटचे चित्रपटच उर्वरित वर्षात बॉक्स ऑफिसवर आपली छाप पाडण्याचा प्रयत्न करतील.
मागील काही वर्षातील दिवाळीवेळी रिलीज झालेले चित्रपट :
2019: चित्रपट- हाऊसफुल 4, कमाई- 210 कोटी
2021: चित्रपट- सूर्यवंशी, कमाई- 196 कोटी
2022: राम सेतु, थँक गॉड, कमाई- 111 कोटी
2023: टायगर -3, कमाई- 283 कोटी
2024: सिंघम अगेन, भूल भुलैया 3, कमाई- 552 कोटी
