लॉस एंजेलिसमधील प्रसिद्ध क्रिप्टो डॉट कॉम एरिना येथे पार पडलेला 68 वा वार्षिक ग्रॅमी पुरस्कार सोहळा हा केवळ संगीताचा उत्सव न ठरता जागतिक संस्कृतीतील एक ऐतिहासिक क्षण म्हणून नोंदवला गेला आहे. यंदाचा ग्रॅमी सोहळा कलात्मकता, तंत्रज्ञान आणि मानवी भावनांचा एक अद्भुत संगम होता. या दिमाखदार सोहळ्याचे सर्वात मोठे वैशिष्ट्य म्हणजे संगीताच्या क्षेत्रातील पिढीबदल स्पष्टपणे जाणवला.
युवा पिढीचा आयकॉन असलेल्या बॅड बनी याने ‘अल्बम ऑफ द इयर’ हा सर्वोच्च पुरस्कार पटकावून जागतिक स्तरावर लॅटिन संगीताची ताकद पुन्हा एकदा सिद्ध केली; मात्र या सोहळ्यातील सर्वात भावनिक आणि आश्चर्यकारक क्षण तो होता जेव्हा शांततेचा संदेश देणारे आध्यात्मिक नेते दलाई लामा यांना त्यांच्या मंत्रोच्चार आणि आध्यात्मिक ध्वनिमुद्रणासाठी ग्रॅमी पुरस्काराने सन्मानित करण्यात आले. हा क्षण उपस्थित सर्वांसाठीच थक्क करणारा आणि प्रेरणादायी होता. याच मंचावर चित्रपट क्षेत्रातील दिग्गज दिग्दर्शक स्टीव्हन स्पीलबर्ग यांनी आपल्या कारकिर्दीतील पहिले ग्रॅमी पदक स्वीकारले, ज्यामुळे त्यांना एॠजढ (एमी, ग्रॅमी, ऑस्कर आणि टोनी पुरस्कार विजेते) या अत्यंत दुर्मीळ क्लबमध्ये मानाचे स्थान मिळाले.
यावेळच्या सोहळ्याचे तांत्रिक पैलूही विशेष चर्चेत राहिले. एरिनामध्ये वापरण्यात आलेले थी-डी ऑडिओ तंत्रज्ञान आणि व्हर्च्युअल रिॲलिटीच्या माध्यमातून प्रेक्षकांना मिळालेला अनुभव हा अभूतपूर्व होता. संगीताच्या सादरीकरणामध्ये कृत्रिम बुद्धिमत्तेचा (एआय) वापर करून काही दिवंगत गायकांना आभासी पद्धतीने मंचावर जिवंत करण्यात आले, जे पाहून अनेक प्रेक्षकांच्या डोळ्यांच्या कडा पाणावल्या.
हा केवळ पुरस्कारांचा कार्यक्रम न राहता, मानवी सर्जनशीलतेचा गौरव करणारा सोहळा ठरला. पुरस्कारांच्या वितरणामध्ये यावर्षी विविधता आणि समावेशकतेला मोठे प्राधान्य दिल्याचे दिसून आले. आफ्रिकन आणि आशियाई कलाकारांच्या नामांकनांची संख्या लक्षणीय होती, ज्यामुळे ग्रॅमी आता केवळ पाश्चिमात्य संगीतापुरते मर्यादित न राहता खऱ्या अर्थाने ‘जागतिक’ झाल्याचे प्रत्ययाला आले. रेड कार्पेटवरील फॅशन असो वा मंचावरील आक्रमक सादरीकरण, प्रत्येक गोष्टीतून एक नवीन ऊर्जा प्रवाहित होत होती.
टेलर स्विफ्ट, बिली आयलिश आणि बियॉन्सेसारख्या अनुभवी कलाकारांनी नव्या दमाच्या कलाकारांचे केलेले कौतुक हे या उद्योगातील खिलाडूवृत्तीचे दर्शन घडवणारे होते. महिला कलाकारांनी महत्त्वाच्या श्रेणींमध्ये मिळवलेले यश हे या वर्षाच्या सोहळ्याचे आणखी एक ठळक वैशिष्ट्य ठरले. संगीतातील बदलत्या प्रवाहांची दखल घेतानाच जुन्या जाणत्या कलाकारांचा सन्मान राखण्याची ग्रॅमीची परंपरा यंदाही तितकीच दिमाखदार पद्धतीने जपली गेली. एकूणच 68 वा ग्रॅमी पुरस्कार सोहळा हा भविष्यातील संगीताची दिशा ठरवणारा आणि कलाविश्वातील नव्या क्रांतीची साक्ष देणारा एक अविस्मरणीय सोहळा ठरला, ज्याची चर्चा पुढील अनेक दशके होत राहील.
